مظفرگڑھ (مظفرگڑھ ڈاٹ سٹی۔ 13 اگست2022ء) مظفرگڑھ میں زہریلی شراب پینے سے مرنے والوں کی تعداد 10 ہو گئی ہے ۔ترجمان پولیس کے مطابق مظفرگڑھ کی تحصیل علی پور میں سانول نامی شراب فروش نے 15 افراد کو شراب فراہم کی تھی جن میں سے اب تک عبدالوحید،منور،بلال،عرفان،رمضان،رانا اسد اور ارشاد بی بی زہریلی شراب پینے سے ہلاک ہو چکے ہیں اور باقی شراب پینے والوں کی حالت بھی تشویشناک ہے۔
انہوں نے بتایا کہ ڈی پی او سید احمد نواز شاہ نے واقعہ کا نوٹس لیتے ہوئے معاملے کی تحقیقات کے لیے ایس پی انویسٹی گیشن کی سربراہی میں تحقیقاتی کمیٹی بنا دی ہے اور فوری طور پر ایس ایچ او تھانہ سٹی جہانزیب لغاری اور ایس ایچ او تھانہ صدر علی پور سجاد حیدر کو معطل کر کے لائن حاضر کر دیا ہے۔انہوں نے مزید بتایا کہ پولیس نے شراب فروش سانول کو گرفتار کر کے مقدمہ درج کر لیا ہے۔