مظفرگڑھ (مظفرگڑھ ڈاٹ سٹی۔ 01 نومبر2022ء) مظفرگڑھ میں رشتہ کے تنازع پر لڑکی کوقتل کرنے والے نوجوان کو بھی قتل کردیاگیا۔پولیس ذرائع کے مطابق کوٹ ادو کے علاقہ احسان پور کی بستی آرائیں والا میں رشتہ کے تنازعہ پر دوہرے قتل کا افسوسناک واقعہ پیش آیا ہے۔رشتہ دینے سے انکار کرنے پر لڑکی کو قتل کرنے والے نوجوان کو بھی لڑکی کے ورثا نے مار ڈالا ۔
سعودی عرب سے آئے نوجوان عمران ولد محمد یاسین کا رشتہ اس کے چچا محمد یونس کی بیٹی مدیحہ سے طے ہو چکا تھا لیکن بعد میں چچا نے رشتہ دینے سے انکار کر دیا
رشتہ سے انکار پر عمران نے چچا کے گھر جا کر فائر نگ کر کے 18 سالہ مدیحہ کو قتل کر دیا، فائرنگ سے لڑکی کے والد بھی زخمی ہوئے،گھر میں موجود لڑکی کے ورثا نے جوابی کارروائی کرتے ہوئے عمران کو بھی کلہاڑیوں کے وار کر کے شدید زخمی کر دیا جو ہسپتال جاتے ہوئے زخموں کی تاب نہ لاتے ہوئے جاں بحق ہو گیا۔
پولیس اور ریسکیو ٹیمیں موقع پر پہنچ گئیں، دونوں نعشوں کو پوسٹمارٹم کےلئے آر ایچ سی ہسپتال دائرہ دین پناہ منتقل کر دیا گیا ۔کرائم سین یونٹ اور فرانزک ٹیموں نے موقع واردات سے شواہد اکٹھے کر لئے ہیں، پولیس تھانہ احسان پور نے مزید کارروائی شروع کر دی ہے۔