مظفرگڑھ میں اسپائر گروپ آف کالجز پولیس شہدا کے بچوں کو فری تعلیمی پیکج فراہم کریگا،پولیس ترجمان

مظفرگڑھ (مظفرگڑھ ڈاٹ سٹی۔ 21 فروری2023ء) مظفرگڑھ میں اسپائر گروپ آف کالجز پولیس شہدا کے بچوں کو فری اور بقیہ تمام ملازمین کے بچوں کو 50 فی صد رعائتی تعلیمی پیکج فراہم کریگا، ڈی پی او رضا صفدر اور اسپائر کالجز انتظامیہ سے آئی جی پنجاب کی منظوری کے بعد معاہدہ طے پاگیا ہے۔

پولیس ترجمان کے مطابق آئی جی پنجاب کی ہدایت اور منظوری کے بعد ڈی پی او رضا صفدر ، قصبہ گجرات اور کوٹ ادو اسپائر کالجز کے پرنسپلز کے ساتھ خصوصی رعائتی پیکج کا معاہدہ طے ہو گیا ،جس میں شہدا کے بچوں کو فری اور بقیہ تمام ملازمین کے بچوں کو 50 فی صد رعایت دی جائیگی،اس موقع پر ڈی پی او اور کالج پرنسپلز نے یادداشت پر دستخط بھی کیے، ڈی پی او نے کالجز انتظامیہ کا خصوصی شکریہ ادا کیا، ڈی پی او کا کہنا تھا پولیس ملازمین کے بچوں کی تعلیمی سہولیات کی خاطر تمام اداروں سے رابطہ کیا جا رہا ہے، بچوں کو بہترین اور رعائتی پیکج کے ساتھ سہولیات فراہم کی جائینگی۔

یاد رہے کہ ڈی پی او فیڈریشن آف رجسٹرڈ پرائیویٹ اسکولز کے ساتھ بھی پولیس شہدا اور پولیس اہلکاروں کے بچوں کی تعلیم کے سلسلے میں ایسا ہی ایک معاہدہ قبل ازیں کر چکے ہیں۔