مظفرگڑھ (اُردو پوائنٹ اخبارتازہ ترین – اے پی پی۔ 18 جنوری2023ء) ڈپٹی کمشنر مظفر گڑھ کیپٹن (ر) سمیع اللہ فاروق نے کہا ہے کہ ضلع بھرمیں جاری ترقیاتی منصوبوں کو جلد سے جلد مکمل کیا جائے، کام اور میٹریل کے معیار کو بہتر بنایا جائے، متعلقہ محکموں کے سربراہان اپنے اپنے منصوبوں کوخود بھی چیک کریں اور اگر کوئی شکایت ہو تو فوری آگاہ کیا جائے۔یہ بات انہوں نے ضلعی ترقیاتی کمیٹی کے اجلاس کی صدارت کرتے ہوئے کہی۔

ڈپٹی کمشنر نے کہا ہے کہ تمام منصوبوں کو مانیٹر کیا جا رہا ہے اگر کہیں بدعنوانی سامنے آئی تو نہ صرف متعلقہ اداروں کے سیکرٹری صاحبان کو تحفظات سے آگاہ کیا جائے گا بلکہ انٹی کرپشن کو بھی کیس بھیجا جائے گا۔ انہوں نے اسسٹنٹ ڈائریکٹر ٹیکنیکل تنویر احمد سہو کو ہدایت کی کہ وہ تمام منصوبوں کا معائنہ کریں کام اور میٹریل کے معیار کی پڑتال کریں اور ایک مفصل رپورٹ مرتب کریں۔انہوں نے کہا کہ وہ خود بھی مختلف اوقات میں مختلف منصوبوں کو چیک کریں گے۔ ڈپٹی کمشنر نے مزید کہا کہ جن ٹھیکیداروں نے کام کیا ہے ان کے بلوں کی ادائیگی کو یقینی بنایا جائے او ر اگر کسی ٹھیکیدار نے ابھی تک کام شروع نہیں کیا ان کو فوری طور پر بلیک لسٹ کیا جائے۔