مظفر گڑھ (مظفرگڑھ ڈاٹ سٹی ۔ 24 اگست 2021ء ) صوبہ پنجاب کے جنوب میں واقع شہر مظفر گڑھ میں ملزمان نے بیچ سڑک شوہر کے سامنے حاملہ خاتون کو بے لباس کردیا۔ میڈیارپورٹ کے مطابق یہ افسوسناک واقعہ 8 اگست کو اس وقت پیش آیا جب حاملہ خاتون اپنے شوہر کے ساتھ موٹر سائیکل پر دوا لے کر گھر جارہی تھی کہ اس دوران انہیں 5 ملزمان نے راستے میں گھیر کر روکا اور شرمناک حرکت کی ، ملزمان کی جانب سے خاتون کے شوہر پر بھی تشدد کیا گیا۔
ذرائع سے معلوم ہوا ہے کہ متاثرہ خاتون کے بھائی پر ایک ملزم کی بہن سے زیادتی کا الزام ہے ، جس کی جانب سے مبینہ طور پر بدلہ لینے کے لیے یہ حرکت کی گئی ، واقعے کو 2 ہفتے گزرنے کے باوجود 5 میں سے 3 ملزمان گرفتار نہ کیے جاسکے کیوں کہ تینوں ملزمان کی عبوری ضمانت ہوچکی ہے۔
ڈیرہ غازی خان کے ریجنل پولیس آفیسر نے کہا ہے کہ دیگر 3 نامزد ملزمان کی عبوری ضمانت منسوخ کروائی جائے گی ، اس کے ساتھ ساتھ اس بات کی انکوائری بھی کی جائے گی کہ ملزمان کو ضمانت کا موقع کیوں ملا۔
بتایا گیا ہے کہ وزیراعلیٰ پنجاب سردار عثمان بزدار نے شوہر کے سامنے خاتون سے اس شرمناک سلوک کے واقعے پر پولیس حکام سے رپورٹ طلب کی ہے ، انہوں نے کہا ہے کہ واقعہ ناقابل برداشت ہے ، متاثرہ جوڑے کو فوری انصاف فراہم کیا جائے۔ یاد رہے کہ ایسا ہی ایک واقعہ 20 جولائی کو پتوکی میں بھی پیش آیا تھا جہاں رات گئے ڈاکوؤں نے دوران واردات شوہر کے سامنے اس کی بیوی کو جنسی ہوس کا نشانہ بنا ڈالا ، پولیس نے خاتون سے زیادتی کا مقدمہ درج کر لیا ، پولیس کی جانب سے درج کی گئی ایف آئی آر میں کہا گیا کہ میاں بیوی عید کی شاپنگ کے بعد پتوکی کے میگا روڈ پر جمشیر اڈا کے قریب پہنچے تو ڈاکوؤں نے انہیں روکا ، جمشیر اڈا کے قریب رات گئے ڈاکوؤں نے دورانِ واردات شوہر کے سامنے خاتون کو زیادتی کا نشانہ بنایا۔
ڈی پی او قصور کے مطابق پتوکی پولیس نے واقعہ کی تحقیقات کا آغاز کر دیا ہے جب کہ ملزمان کی گرفتاری کے لیے ڈی ایس پی کی سربراہی میں ٹیمیں بھی تشکیل دے دی گئی ہیں ، دورانِ ڈکیتی زیادتی کا واقعہ انتہائی افسوس ناک ہے، رات سے آر پی او انعام وحید اور میں خود کیس کو ذاتی طور پر دیکھ رہے ہیں، ملزمان کی گرفتاری کے لیے تمام تر وسائل بروئے کار لائے جائیں گے، کرائم سین اور دیگر قانون نافذ کرنے والوں اداروں کی بھی مدد لی جا رہی ہے۔