مظفرگڑھ ،نایاب نسل کے پرندوں کا شکار کرنے والے شکاریوں کے خلاف کریک ڈا ؤن شروع

مظفرگڑھ(مظفرگڑھ ڈاٹ سٹی۔ 06 مارچ2023ء) ڈائریکٹر جنرل وائلڈ لائف پنجاب کی ہدائت پر اسسٹنٹ ڈائریکٹر وائلڈ لائف مظفرگڑھ عبدالرزاق بلوچ نے مہمان مسافر پرندوں مرغابی ، بٹیر ، تیتر،چکور اور کئی نایاب نسل کے پرندوں کا شکار کرنے والے شکاریوں کے خلاف کریک ڈا ؤن شروع کر دیا ہے۔

اسسٹنٹ ڈائریکٹر وائلڈ لائف عبدالرزاق بلوچ کے مطابق ڈی جی وائلڈ لائف نے ہدایت کی ہے کہ دریائے چناب ، دریائے سندھ پر اور ضلع میں موجود آبی گزرگاہوں، تالابوں پر غیر قانونی طور پر مرغابی کے ناجائز غیرقانونی شکار کے خلاف ایکشن لے کر مسافر پرندوں کو ظالم،بے رحم شکاریوں سے ہر صورت بچایا جائے، اسسٹنٹ ڈائریکٹر وائلڈ لائف مظفرگڑھ نے ڈی جی وائلڈ لائف کے حکم کی تعمیل کرتے ہوئے دریائے چناب اور دریائے سندھ پر اور خانپور رینج ، رنگلا، ہیڈ محمد والا رنگپور ،جتوئی ، علی پورمیں محکمہ وائلڈ لائف کی ٹیمیں تشکیل دے دی ہیں اور خود بھی ان کے ہمراہ شکاریوں کا تعاقب کر کے آئے روز ان سے بیٹریاں ، جال،کیسٹیں، لاواجات،مصنوعی مرغابیاں، بندوقیں،اور شکار میں کام آنے والا دیگر سامان قبضے میں لے کر قانون کے مطابق کاروائی کرتے ہوئے ان پر جرمانے عائد کئے اور متعدد شکاریوں کو شکار کرتے ہوئے رنگے ہاتھوں گرفتار کیا ان کا کہنا ہے کہ وہ اپنی ٹیم کے ہمراہ ان ظالم شکاریوں کے خلاف کاروائی مستقل بنیادوں پر جاری رکھیں گے۔