مظفرگڑھ۔ (مظفرگڑھ ڈاٹ سٹی۔ 27 دسمبر2019ء) وزیر مملکت ڈاکٹر شبیر علی قریشی نے چوک سرور شہید میں بجلی کے کروڑوں روپے کی لاگت سے مکمل ہونے والے 2 میگا پراجیکٹ منصوبوں کا افتتاح کر دیا۔ دونوں منصوبے ایک سال کی قلیل مدت میں پورے کئے گئے، جن پر 9 کروڑ کی لاگت آئی۔
اس موقع پر میڈیا سے گفتگو کرتے ہوئے وزیر مملکت نے کہا کہ عزیز فیڈر اور بہار فیڈر کا کام مکمل ہونے سے عوام کو بجلی کے حوالے سے درپیش مسائل سے چھٹکارہ حاصل ہوگا اور چوک سرور شہید اور اس کے اردگرد کے علاقوں کے ہزاروں افراد کو ان منصوبوں کی تکمیل سے فائدہ ہو گا۔
انہوں نے کہا کہ تحریک انصاف کی حکومت عوامی فلاح کے کاموں کو اولیت اور بہت اہمیت دیتی ہے۔بعدازاں وزیر مملکت میاں شبیر علی قریشی نے چوک سرور شہید ہسپتال میں ڈینٹل یونٹ کا بھی افتتاح کیا۔ اس کے علاوہ انہوں نے عوامی مسائل سننے کے لیے کھلی کچہری بھی لگائی، جہاں عوام کے مسائل ترجیحی بنیادوں پر حل کرنے کے عزم کا اظہار کیا ۔