مظفرگڑھ (مظفر گڑھ ڈاٹ سٹی۔ 03 اپریل2019ء) معراج النبی پر مکمل یقین کرنا ایمان کی کامل نشانی ہے۔ خاتم النبی حضرت محمد مصطفیٰ نے اپنی پیاری اور محبوب امت مسلمہ کی فلاح و بہبود اور بہتری کیلئے نماز اور عبادات کے عمل کو مکمل کیا، اللہ تعالی نے اپنے پیارے محبوب رسول کریم کو تمام کائنات اور مخلوقات کیلئے رحمت بناکر بھیجا، ملت اسلامیہ کو خاتم النبی حضرت محمد مصطفیٰ سے عشق و محبت کا مکمل اظہار کرتے ہوئے آپ کی سنتوں پر مکمل عمل کرنا چاہئے تاکہ وہ دنیا و آخرت میں کامیابی و کامرانی حاصل کر سکیں۔ان خیالات کااظہار راجپوت یوتھ اور مرکزی میلاد النبی کمیٹی کے زیر اہتمام سالانہ محفل معراج النبی کانفرنس سے سابق وفاقی وزیر مذہبی امور علامہ سید حامد سعید کاظمی، پیر رانا فلک شیرعلی خان نقشبندی، سید ہلال جاوید کاظمی، سید غلام علی بخاری و دیگر نے خطاب کرتے ہوئے کیا۔ جبکہ ثناء خواں مصطفیٰ غلام اصغر غازی،رانا بلال بشیر،سید حسنین رضا ہاشمی،حافظ خلیل احمد،سجاد احمد گولڑوی ،محمدعمران نے نذرانہ عقیدت کے پھول نچھاور کئے، بعد ازاں حاضرین میں لنگر تقسیم کیا گیا۔