مظفرگڑھ، محرم الحرام کے انتظامات کے پیش نظرڈسٹرکٹ ایمرجنسی آفیسر کا امام بارگاہوں کا دورہ

مظفرگڑھ (مظفرگڑھ ڈاٹ سٹی ۔ 04 ستمبر2019ء) ڈپٹی کمشنر ڈاکٹر احتشام انور کی ہدایات پر ڈسٹرکٹ ایمرجنسی آفیسر ڈاکٹر محمد ارشاد الحق نے محرم الحرام میں برآمد ہونے والے جلوسوں کے روٹس کے بارے کیے گئے انتظامات کا جائزہ لینے کے لیے امام بارگاہوں کا دورہ کیا۔
اس دوران ڈسٹرکٹ ایمرجنسی آفیسر نے شہر کی بڑی امام بارگاہوں کے متولی صاحبان سے ملاقات کی اور ان کو ضلعی حکومت اور ریسکیو 1122 کی طرف سے کیے گئے انتظامات کے بارے آگاہ کیا جس پر متولی صاحبان نے اطمینان کا اظہار کیا اور محرم الحرام کے جلوسوں کے دوران ہمہ قسمی تعاون کرنے کی یقین دہانی کرائی۔

ڈسٹرکٹ ایمرجنسی آفیسر نے امام بارگاہ ٹبی حسین آباد، امام بارگاہ جامعتہ المفید، امام بارگاہ امامیہ، امام بارگاہ مگسی والا اور امام بارگاہ کربلا محلہ کے روٹس کا دورہ کیا۔