مظفرگڑھ (مظفرگڑھ ڈاٹ سٹی۔ 04 جولائی2020ء) سودخور کے خلاف منی لانڈرنگ ایکٹ کے تحت مقدمہ درج کرلیا گیا۔ مظفرگڑھ کے نواحی قصبہ چوک سرور شہید کے چک نمبر 561 کے رہائشی متاثرہ شخص آصف کے مطابق اس نے اسداللہ نامی شخص سے ڈیڑھ لاکھ روپے سود پر لئے تھے جو وہ اصل زر سود سمیت ادا کر چکا ہے لیکن سودخور اسداللہ اسے مزید رقم ادا کرنے کیلئے دباو ڈال رہا تھا اور ہراساں کر رہا تھا، اسداللہ نے مزید رقم نہ دینے کی صورت میں اس کے 2 بیٹوں کو جان سے مارنے کی دھمکیاں اور اسے خطرناک نتائج بھگتنے کی دھمکیاں بھی دیں۔متاثرہ شخص نے بتایا کہ مقامی بااثر افراد نے بھی سودخور کے خلاف اس کی مدد نہیں کی۔ ڈی پی او مظفرگڑھ سید ندیم عباس نے اس کی شکایت پر پولیس تھانہ چوک سرور شہید کو سود خور کے خلاف منی لانڈرنگ ایکٹ کے تحت مقدمہ درج کرنے اور شہری کو انصاف فراہم کرنے کا حکم دے دیا جس پر پولیس نے سودخور کے خلاف مقدمہ درج کرکے قانونی کارروائی کا آغاز کر دیا۔