مظفرگڑھ ۔ (مظفر گڑھ ڈاٹ سٹی۔ 24 مئی2019ء) ڈپٹی کمشنر مظفرگڑھ ڈاکٹرا حتشام انور نے کہا ہے کہ شہر سے گزرنے والی دو رویہ شاہراہ کے منصوبے کا فنڈ کہیں نہیں گیا، جلد ہی اس کے فنڈز جاری ہو جائیں گے اور اس پر کام شروع کردیا جائے گا انہوں نے ایکسین مواصلات و تعمیرات کو ہدایت کی کہ وہ اس سلسلے میں مکمل کاغذات تیار کریں اور اس کی پیروری کریں یہ بات انہوں نے ضلع کونسل ہال مظفرگڑھ میں منعقدہ ہفتہ وار کھلی کچہری میں سینئر صحافی ماجد خانزادہ کی شکایت کے جواب میں کہی،انہوں نے کہا کہ ضلع کونسل اور میونسپل کمیٹی کے انتظامات کو ضلعی انتظامیہ نے سنبھال لیا ہے تاہم ابھی ریکارڈکی پڑتال کی جارہی ہے اور بنیادی کام کئے جارہے ہیں، جونہی معاملات سیدھے ہوئے شہر کی ترقیاتی منصوبہ جات پر کام شروع کردیا جائے گا، پارک، کھیل کے میدان، سٹریٹ لائیٹس اور دیگر ترقیاتی منصوبہ جات پر کام کیا جائے گا، اس موقع پر اے ڈی سی ریونیو و ایڈمنسٹریٹرمیونسپل کمیٹی مظفرگڑھ عطائ الحق نے بتایا کہ میونسپل کمیٹی مظفرگڑھ کے سابقہ ملازمین کی پینشن کی مد میں 66لاکھ روپے دینا ہیں، حالات بہتر ہوتے ہی دیگر کاموں جس میں تجاوزات کا خاتمہ،گلی محلوں کی صفائی، گٹروں کے ڈھکن، گلیوں کی مرمت اور سٹریٹ لائیٹس شامل ہیں پر توجہ دی جائے گی، کھلی کچہری میں محکمہ ریونیو، محکمہ ماحولیات، محکمہ تعلیم، میونسپل کمیٹی اور ضلع کونسل سے متعلق سائلین نے درخواستیں دیں جس پر ڈپٹی کمشنر نے فوری حل کیلئے احکامات جاری کئے، اس موقع پر اسسٹنٹ کمشنر مظفرگڑھ ظہور حسین بھٹہ، سی ای او تعلیم مسعود ندیم، ایڈیشنل ڈائریکٹر لائیو سٹاک آصف جاہ، ڈپٹی ڈائریکٹر سوشل ویلفیئر اظہر یوسف سمیت ضلعی محکموں کے سربراہان نے شرکت کی۔