مظفر گڑھ میں میانوالی روڈ پر بس کی گاڑی کو ٹکر کے نتیجے میں ایک ہی خاندان کے 3 افراد جاں بحق اور 2 زخمی ہوگئے۔
تحصیل کوٹ ادو میں واندھڑ کے قریب ملتان سے ڈیرہ اسماعیل خان جانے والی نجی کمپنی کی تیز رفتار مسافر بس نے گاڑی کو ٹکر مار دی۔
پولیس کے مطابق حادثے میں گاڑی میں سوار 2 خواتین سمیت 3 افراد جاں بحق ہوگئے جب کہ دیگر 2 خواتین بھی شدید زخمی ہوگئیں۔ کار پر سوار افراد لیہ سے منڈی یزمان جا رہے تھے۔
ریسکیو عملے نے لاشوں اور زخمیوں کو تحصیل ہیڈکوارٹر اسپتال چوک سرور شہید منتقل کر دیا۔
جاں بحق افراد میں محمد سرور ولد صفدر حسین، ثریا زوجہ محمد رمضان اور رافعہ دختر محمد رمضان جب کہ زخمیوں میں ثمینہ بی بی زوجہ محمد سرور، ہادیہ بی بی دختر محمد سرور اور ذکیہ بی بی زوجہ محمد اقبال شامل ہیں۔
پولیس نے حادثے کا سبب بننے والی مسافر بس کو تحویل میں لے لیا جب کہ بس ڈرائیور فرار ہونے میں کامیاب ہوگیا۔