مسلم لیگ ن کے کارکنوں کا ورکر کنونشن میں پولیس اہلکار پربدترین تشدد

ایلیٹ فورس کے اہلکار کو سابق ایم پی اے حماد نواز نے سیڑھیوں پر گھسیٹا، کارکنوں نے بھی تشدد کا نشانہ بنایا، ڈی ایس پی نے جاں بخشی کروائی

مظفر گڑھ (مظفرگڑھ ڈاٹ سٹی ۔ 06 نومبر2020ء) مظفر گڑھ میں مسلم لیگ نواز کے ورکر کنونشن میں کارکنوں نے پولیس اہلکار کو بدترین تشدد کا نشانہ بنا ڈالا ۔ میڈیا رپورٹس کے مطابق ن لیگ کے ورکر کنونشن میں سٹیج کے قریب ایلیٹ فورس کے اہلکار کو مسلم لیگی کارکنوں کی جانب سے مبینہ طور پر تشدد کا نشانہ بنایا گیا ۔

سٹیج پر موجود ورکر کنونشن کے منتظم اور سابق ایم پی اے حماد نواز نے ایلیٹ فورس کے اہلکار کو سیڑھیوں پر گھسیٹا اور اسے شدید زد و کوب کیا۔

اس موقع پر دیگر پولیس اہلکار اس کو چھروانے کی کوشش کرتے رہے لیکن مسلم لیگی ورکرز نے انہیں بھی دھکے دیے اور تشدد کا نشانہ بنایا، ڈی ایس پی نے آ کر اہلکار کی جان خلاصی کروائی ، جبکہ ورکرز کنونشن کے منتظم حماد نواز کا کہنا تھا کہ اہلکار سٹیج پر موجود مہمانوں سے بدتمیزی کررہا تھا جن میں کئی ایم پی ایز شامل تھے ۔ واقعے کی ویڈیو وائرل ہونے کے بعد ن لیگی ایم پی اے کو شدید تنقید کا سامنا کرنا پڑ رہا ہے ۔