محبوب کی تلاش میں چین سے مظفرگڑھ آنے والی ڈولی کا بالآخر امین سے رابطہ ہو ہی گیا

مظفرگڑھ(مظفر گڑھ ڈاٹ سٹی۔3 نومبر۔2015ء) محبوب کی تلاش میں چین سے مظفرگڑھ آنے والی ڈولی کا بالآخر امین سے رابطہ ہو ہی گیاہے تاہم ڈولی کا کہناہے کہ امین تو چین میں ہے جبکہ اس کے پاس اب چین جانے کا کرایہ نہیں ہے جس پر پولیس نے اسے سرکٹ ہاوٴس منتقل کردیا ہے۔کمپیوٹر کے سامنے بیٹھی اپنے نصیبوں کو روتی چین کی ڈولی کی ملاقات چین کے ایک میڈیکل کالج میں پاکستانی نوجوان امین سے ہوئی تھی،یہ ملاقات پہلے دوستی اور پھر محبت میں بدل گئی لیکن ضلع مظفرگڑھ کی تحصیل علی پور کے رہائشی نوجوان نے محبت کا پاس نہ رکھا اور غائب ہوگیا ۔ڈولی نے امین کو علی پور میں گلی گلی ڈھونڈا ،مگر کوئی خبر نہ ملی ، مگر اس کی اس تلاش کی اطلاع پولیس کو ضرور ہو گئی ،پولیس نے پہلے اسے تھانے اور پھر لاہو ر میں چینی سفارت خانے منتقل کیا لیکن ڈولی پھر لوٹ آئی ،پولیس نے پھر اسے لاہور منتقل کیالیکن محبت کی تڑپ ایسی تھی کہ محبوب کی تلاش نے اسے دوسری بار پھر سے وہیں لاکھڑا کیا، میڈیاسے گفتگو میں ڈولی نے کہا اْسکا امین سے رابطہ ہوگیا اور وہ چین میں ہے،لیکن اب اس کے پاس اتنے پیسے نہیں کہ واپس چین جاسکے ۔دوسری جانب جب پولیس نے امین کی ماں سے رابطہ کیا تو انھوں نے ڈولی کو رکھنے سے انکار کردیاجس سے لگتا ہے کہ محبت کی یہ بیل منڈے چڑھنا مشکل ہے-