مظفرگڑھ ۔22مارچ(مظفر گڑھ ڈاٹ سٹی۔ 23 مارچ2017ء) ڈپٹی کمشنر مظفرگڑھ محمد سیف انور جپہ نے کہا ہے کہ ماحولیاتی آلودگی کے خاتمے کیلئے زیادہ سے زیادہ درخت لگائے جائیں تاکہ ہم اپنے ماحول کو خوبصورت بنا سکیں، انہوں نے کہا کہ اس سال مظفرگڑھ میں شجرکاری مہم کے دوران 3لاکھ 45ہزار پودے لگائے جائیں گے۔مظفرگڑھ میں ڈی سی کمپلیس کے لان میں پودا لگارکر شجرکاری مہم کا افتتاح کرنے کے موقع پرجہاں ایڈیشنل ڈپٹی کمشنر ریونیو مہر خالد ،ایڈیشنل ڈپٹی کمشنر جنرل محمد شہزاد مگسی اور ڈسٹرکٹ فاریسٹ آفیسر چوہدری محمد ارشاد بھی ان کے ہمراہ تھے۔ڈپٹی کمشنر نے کہا کہ درخت لگانا صدقہ جاریہ ہے درخت زیادہ سے زیادہ آکسیجن فراہم کرتے ہیں، اس سے ہمارا ماحول اور ہماری فضا زیادہ سازگار رہتی ہے ، انہوںنے کہا کہ شہری شجر کاری مہم میں بڑھ چڑھ کر حصہ لیں اور ہر آدمی اپنے حصہ کا پودا لگائے، انہوں نے کہا کہ میڈیا عوام کو درختوں کی اہمیت کے حوالے سے آگاہی فراہم کرے، انہوں نے کہا کہ ضلع مظفرگڑھ کے تمام سرکاری اداروں کے سربراہ اپنے اپنے دفاتر میں بھی پودے لگائیں تاکہ عوام بھی پودے لگانے کی طرف راغب ہوں۔