مظفرگڑھ ۔ (مظفر گڑھ ڈاٹ سٹی۔ 10 اپریل2019ء) ڈپٹی کمشنر مظفرگڑھ ڈاکٹر احتشام انور نے کہا کہ ضلع مظفر گڑھ کے غریب عوام کو صحت کی بہترین سہولیات کی فراہمی حکومت پنجاب کی اولین ترجیح ہے۔ انہوں نے کہا ڈسٹرکٹ ہیڈ کوارٹر ہسپتال مظفرگڑھ ضلع کی 45 لاکھ آبادی کو علاج ومعالجہ کی فراہمی میں اہم کردار ادا کررہا ہے، اس ہسپتال کو جدید سہولیات سے آراستہ کرنا اور یہاں بہتر ماحول مہیا کرنا اشد ضروری ہے۔انہوں نے کہا کہ ہسپتال میں مریضوں کو علاج اور ادویات کی فراہمی کے ساتھ صفائی ستھرائی کا بھی خاص خیال رکھا جائے۔ انہوں نے کہا کہ ہسپتال میں پارکنگ کے مسائل کو حل کیا جائے، انٹری اور ایگزٹ گیٹ الگ کئے جائیں تاکہ مریضوں کو پریشانی کا سامنا نہ کرنا پڑے۔ ان خیالات کا اظہار انہوں نے ڈسٹرکٹ ہیڈ کوارٹر ہسپتال مظفرگڑھ کے دورہ کے موقع پر کیا۔ انہوں نے ہسپتال میں ہیلتھ کونسل کے اجلاس کی صدارت بھی کی اس موقع پر چیف ایگزیکٹو آفیسر ہیلتھ ڈاکٹر ضیاء الحسن اور ایم ایس ڈاکٹر مہر اقبال سمیت دیگر حکام موجود تھے۔ ڈپٹی کمشنر نے ہسپتال کے مختلف حصوں کا معائنہ کیا اور مریضوں سے علاج و معالجہ کی سہولیات کے بارے دریافت کیا۔