ضلعی انتظامیہ بچوں کو متعدی امراض سے محفوظ رکھنے کے لیے پرعزم ہے، ڈی ایچ اومظفرگڑھ

مظفرگڑھ ۔ (مظفر گڑھ ڈاٹ سٹی۔ 16 اپریل2019ء) ڈاکٹر طارق محمود ڈی ایچ او (پی ایس) مظفرگڑھ نے کہا ضلعی انتظامیہ بچوں کو متعدی امراض سے محفوظ رکھنے کے لیے پرعزم ہے الحمد اللہ مظفرگڑھ میں گذشتہ 8 سال سے پولیو کا کوئی کیس رپورٹ نہیں ہوا ایم آئی سی ایس(مکس) انٹرنیشنل ایجنسی کے حالیہ سروے کے مطابق بچوں کو حفاظتی ٹیکہ جات کی فراہمی کے لحاظ سے مظفرگڑھ نے مثالی کارکردگی کا مظاہرہ کرتے ہوئے پنجاب بھر میں تیسری پوزیشن حاصل کی ہے یہ بات انہوں نے ڈاکٹر سلیم اکبر لغاری ڈی ایچ او (ایچ آر) کے ہمراہ پولیو مہم اور حفاظتی ٹیکہ جات کی کارکردگی کے سلسلہ میں اپنے وضاحتی بیان میں کہی انہوں نے مزید کہا کہ پولیو مکاؤ مہم کے دوران ضلع کی کارکردگی مثالی رہی ہے اور ہماری کوریج ہمیشہ سو فیصد رہی ہے حالیہ پولیو مہم کے بعد ہونے والے سروے میں بارہ سو بچوں میں پولیو کے قطرے کے بارہ میں معلومات حاصل کی گئیں تمام بچوں کو پولیو سے بچاؤ کے قطرے پلانے گئے تھے محض دو بچوں کو فنگر مارک نہ ہونے کے باعث مشکوک قرار دیا گیا جبکہ ایک بچے کی عمر پانچ سال سے زائد اور تین بچے ضلع لیہ کے رہائشی ہونے کے باوجود سروے میں شامل کئے گئے تھے ان بے ضابطگیوں کے ثبوت حاصل کرنے کے بعد سروے کے نتائج کو چیلنج کر دیا گیا ہے جس پر حکام بالا کو باقاعدہ انکوائری کی استدعا بھی کی گئی ہے۔