مظفرگڑھ (مظفرگڑھ ڈاٹ سٹی 15 نومبر2022ء) 7ویں تھل جیپ ریلی کا آغاز 17نومبر کو مظفرگڑھ کے علاقے ہیڈ محمد والا سے ہوگا۔میگا سپورٹس ایونٹ کے انتظامات کو حتمی شکل دے دی گئی ہے۔مظفرگڑھ،کوٹ ادو اور لیہ 3 اضلاع کے صحرائی علاقے پر مشتمل 190 کلومیٹر طویل اور دشوار ٹریک تیار کر لیا گیا ہے۔جیپ ریلی میں نادر مگسی، سلمی،تشنا پٹیل سمیت ملک بھر سے نامور مرد و خواتین جیپ ریسرز اپنی مہارت کے جوہر دکھائیں گے۔
شیڈول کے مطابق 17 نومبر کو میڈیکل چیک اپ،گاڑیوں کی رجسٹریشن اور ٹیگنگ ہو گی، 18 نومبر کو پری پیئرڈ،سٹاک اور خواتین کیٹیگری کے کوالیفائنگ راونڈ ہوں گے۔ 19 نومبر کو پری پیئرڈ کیٹیگری کے مقابلے ہوں گے اور 20 نومبر کو سٹاک کیٹیگری اور خواتین کیٹیگری کے مقابلے ہوں گے۔20 نومبر کو فیصل سٹیڈیم مظفرگڑھ میں میوزیکل نائٹ اور تقریب تقسیم انعامات منعقد ہو گی۔مظفرگڑھ،کوٹ ادو اور لیہ تینوں اضلاع کی انتظامیہ اس میگا سپورٹس ایونٹ کو یادگار بنانے کےلئے بھرپور کوشش کر رہی ہے،چار روزہ جیپ ریلی کے تمام انتظامات کو حتمی شکل دیدی گئی ہے۔