مظفرگڑھ (مظفرگڑھ ڈاٹ سٹی۔ 21 نومبر2022ء) مینیجنگ ڈائریکٹر پنجاب ٹورازم ڈیویلپمنٹ کارپوریشن آغا محمد علی عباس نے کہا ہے کہ ساتویں تھل جیپ ریلی سے کھیلوں کی سرگرمیوں کو فروغ ملا ہے ،انہوں نے ساتویں تھل جیپ ریلی کے آخری مرحلے کے موقع پر میڈیا سے گفتگو کرتے ہوئے بتایا ہے کہ پنجاب حکومت کا ویژن ہے کہ ایڈونچر بیسڈ اور کلچرل بیسڈ سپورٹس سرگرمیوں کے خوبصورت امتزاج سے اکنامک بیسڈ سپورٹس سرگرمیوں کو فروغ دیا جائے تا کہ تفریح کے ساتھ روزگار کے مواقع بھی پیدا ہوں اور لوگوں کی آمدنی میں بھی اضافہ ہو۔
انہوں نے کہا کہ اس مرتبہ پہلی بار ساتویں تھل جیپ ریلی کے میگا اسپورٹس ایونٹ کے موقع پر مقامی ثقافت کو فروغ دینے کےلئے کبڈی،گھڑ سواری اور نیزہ بازی کے مقابلے بھی کرائے گئے ہیں،میوزیکل نائٹ کا بھی انعقاد کیا گیا ہے جنہیں شائقین نے بہت سراہا ہے اور ان مقابلوں سے اور فوک میوزک سے لطف اندوز بھی ہوئے ہیں۔
انہوں نے کہا کہ تھل جیپ ریلی کی مقبولیت میں ہر سال اضافہ ہو رہا ہے اور اس سال بیرونی ممالک سے بھی چند ریسرز جیپ ریلی میں حصہ لینے کےلئے آئے ہیں،انہوں نے کہا کہ ٹی ڈی سی پی کی کوشش ہے کہ آئندہ سال بیرونی ممالک سے زیادہ سے زیادہ موٹر ریسر بلا کر اس ایونٹ کو انٹرنیشنل ایونٹ بنایا جائے۔
انہوں نے کہا کہ ضلع مظفرگڑھ، ضلع کوٹ ادو اور ضلع لیہ کی انتظامیہ اور پولیس کے تعاون کے بغیر تھل جیپ ریلی جیسے میگا اسپورٹس ایونٹ کا انعقاد ممکن نہیں تھا ۔تینوں اضلاع کی انتظامیہ اور پولیس کے شکرگزار ہیں۔