مظفر گڑھ(مظفر گڑھ ڈاٹ سٹی۔ 09 جون2017ء) عوامی راج پارٹی کے سربراہ جمشید دستی کو زبردستی نہر کھولنے کے جرم میں جوڈیشل ریمانڈ پر سینٹرل جیل ملتان منتقل کردیا گیا ۔تفصیلات کے مطابق گرفتار رکن قومی اسمبلی جمشید دستی اور ان کے ساتھی چیئرمین یونین کونسل اجمل کالرو کو رات گئے پولیس نے ڈیوٹی مجسٹریٹ نعیم بخش کی عدالت میں پیش کرتے ہوئے ان کا جوڈیشل ریمانڈ حاصل لے لیا ۔جس پر عوامی راج پارٹی کے سربراہ اور چیئرمین یونین کونسل کو رات کی تاریکی میں سکیورٹی حصار میں سینٹرل جیل ملتان منتقل کردیاگیا۔یاد رہے کہ جمشید دستی نے اٹھائیس مئی کو مظفرگڑھ کے علاقے موضع ہیڈ کالرو میں کاشتکاروں کی جانب سے نہری پانی کی بندش کی شکایات پراپنے ساتھیوں کے ہمراہ ڈینگا کینال کو خود ہی کھول دیاتھا۔ جس پر ایس ڈی او محکمہ انہار فرخ بٹ کی مدعیت میں ان کے خلاف تھانہ چوک قریشی میں مقدمہ درج کیا گیا تھا۔گزشتہ روز اسلام آباد سے مظفرگڑھ آتے ہوئے چوکی ریاض آباد کے قریب تھانہ قریشی پولیس کی بھاری نفری نے جمشیددستی اور ان کے ساتھی چیئرمین یونین کونسل اجمل کالرو کو گرفتارکرلیاتھا۔ جنہیں مجسٹریٹ کے سامنے پیش کرتے ہوئے ان کا جوڈیشل ریمانڈ حاصل کیا گیا۔