مظفر گڑھ۔7 مارچ(مظفر گڑھ ڈاٹ سٹی۔ 07 مارچ2017ء)مظفرگڑھ پولیس نے جعلی کرنسی بنانے اور لاکھوں روپے کا فراڈ کرنیوالا بین الصوبائی گینگ کا ڈان اختر عرف جگا رنگے ہاتھوں پکڑ لیا،مقدمہ درج کرکے دیگر ملزمان کی گرفتاریوں کے لیے چھاپے جاری۔تفصیل کے مطابق تھانہ سول لائن مظفرگڑھ پولیس نے بین الصوبائی جعلی کرنسی بنانے والے گینگ کے ڈان اختر عرف جگا کو رنگے ہاتھوں گرفتار کرلیا ہے جو سیکورٹی فورسز کی وردی کا استعمال کرنیوالے گینگ کا سرغنہ اور ملزمان پنجاب کے کئی اضلاع کی پولیس کے علاوہ کراچی پولیس کو بھی مطلوب ہیں۔تھانہ سول لائن پولیس نے کرنسی بنانے والی مشین کے نام پر شہری سے لاکھوں روپے کے فراڈ کے انکشاف پر گینگ کے سرغنہ ڈان اخترکو گرفتار کیا۔اور کہروڑ پکا کے رہائشی ڈان اختر عرف جگا نے بین الصوبائی گینگ بنایااور اس گروہ میں ارشاد عرف شادو، ذوالفقار،زاہد، سعید، حنیف اور خلیل سمیت 10 سے زائد ملزمان شامل ہیں۔ جنوبی پنجاب کے مختلف اضلاع کے شہروں میں بین الصوبائی گینگ نے درجنوں وارداتیں کرکے شہریوں کا کنگال بنا چکے ہیں۔گینگ کا سرغنہ ڈان اختر عرف جگا اپنے ساتھی بدنام زمانہ فراڈئیے شادو کے ہمراہ کرنسی بنانے والی مشین اور نوٹ شہری کے پاس ظاہر کرکے اپنے ساتھیوں کو پولیس کی وردی پہنا کر فرضی چھاپہ مروا کر پکڑے جانے کا ڈرامہ بھی رچاتے اور پولیس سے ڈیل کے نام مزید رقم متاثرہ شہری سے طلب کرکے فراڈ کرتے تھے۔ جعلی کرنسی گینگ کے ملزمان بڑے شہروں کے تاجروں اور زمینداروں کو اپنے جال میں پھنساتے تھے۔ تھانہ سول لائن مظفرگڑھ میں گرفتار ہونیوالے جعلی کرنسی گینگ کے سرغنہ ڈان اختر عرف جگا کی گرفتاری کی اطلاع پر متاثرین نے پولیس سے رابطے شروع کردیئے ہیں کیونکہ یہ گینگ عرصہ دراز سے جنوبی پنجاب کے مختلف اضلاع میں متحرک تھا جس کے خلاف کاروائی عمل میں نہ لائی جاسکی تھی۔