مظفر گڑھ۔ (مظفر گڑھ ڈاٹ سٹی۔ 07 اگست2017ء) ڈپٹی کمشنر مظفرگڑھ محمد سیف انور نے کہا ہے کہ ضلعی انتظامیہ اور تمام متعلقہ محکمہ جات سیلاب کے سلسلے میں کسی بھی ہنگامی صورت حال سے نمٹنے کیلئے تیار ہیں۔یہ بات انہوں نے سرکی کے مقام پر سیلاب اور فلڈبندوں کا معائنہ کرتے ہوئے کہی۔ڈپٹی کمشنر نے ریسکیو 1122، محکمہ صحت، محکمہ مال ، محکمہ لائیو سٹاک اور دیگر متعلقہ محکموں کی طرف سے امدادی اور ریلیف کے انتظامات کا جائزہ لیا اور ان پر اطمینان کا اظہار کیا، ڈپٹی کمشنر نے ہدایت کی کہ سیلاب آنے کی صورت میں متاثرہ علاقوں سے لوگوں کو نکالنے ، ان کو محفوظ مقامات تک منتقل کرنے ، ریلیف کیمپ کے قیام ، ریلیف کیمپوںمیں تمام سہولیات کی فراہمی کیلئے انتظامات کو مرتب کئے گئے پلان کے مطابق حتمی شکل دی جائے تاکہ وقت پر کسی دشواری کا سامنا نہ کرنا پڑے، انہوں نے اسسٹنٹ کمشنرز کو ہدایت کی کہ اپنی اپنی تحصیلوں میں فلڈ بندوں کا معائنہ کریں متعلقہ محکموں کے سربراہان سے رابطہ بحال رکھیں،متاثرہ ہونے والے علاقوں سے بلدیاتی عوامی نمائندگان اور رضا کاروں سے ملاقات کریں ان کے رابطہ نمبر حاصل کریں تاکہ موقع پر ان سے رابطہ کیا جاسکے، متاثرہ ہونے والے علاقوں کے مواضعات ، کل آبادی ، وہاں موجود جانور کے ریکارڈ کو مرتب کیا جائے تاکہ ریکارڈ کے مطابق تیار کئے گئے پلان پر عملدآمد آسان ہو سکے،ڈپٹی کمشنر نے دریائے سندھ پر واقع مختلف فلڈ بندوں کا معائنہ کیا۔