مظفرگڑھ (مظفرگڑھ ڈاٹ سٹی۔ 23 فروری2023ء) کمشنر ڈیرہ غازیخان ڈاکٹر ناصر محمود بشیر نے آر پی او ڈیرہ غازیخان ڈویژن کیپٹن ریٹائرڈ سجاد حسین خان کے ہمراہ مظفرگڑھ اور کوٹ ادو میں متعدد ترقیاتی منصوبوں اور دیہی مرکز صحت قصبہ گجرات کا معائنہ کیا۔کمشنر ڈاکٹر ناصر محمود بشیر نے 2 ارب 54 کروڑ روپے کی لاگت سے چوک قریشی تا قصبہ گجرات 12 کلومیٹر طویل دو رویہ زیر تعمیر روڈ کا معائنہ کیا،ایس ای ہائی ویز محمد نواز نے انہیں زیر تعمیر روڈ بارے بریفنگ دی۔
کمشنر نے محکمہ ہائی ویز کے افسران کو ترقیاتی منصوبوں کی کڑی مانیٹرنگ کرنے کی ہدایت کرتے ہوئے کہا کہ مٹیریل کے معیار پر ہرگز سمجھوتہ نہ کریں۔انہوں نے کہا کہ ٹیکنیکل ٹیم سے ترقیاتی منصوبوں کی جانچ پڑتال کرائی جائے گی،انہوں نے کہا کہ افسران دفاتر میں بیٹھنے کی بجائے فیلڈ میں وقت گزاریں۔
بعدازاں کمشنر نے آر ایچ سی ہسپتال قصبہ گجرات میں طبی سہولیات کا جائزہ لیا۔
انہوں نے آر پی او سجاد حیسن خان کے ہمراہ ہسپتال میں داخل مریضوں کی عیادت کی اور ان کے لواحقین سے ہسپتال سے ملنے والی سہولیات بارے معلومات لیں۔انہوں نے داکٹرز اور پیرا میدیکل سٹاف کے مسائل بھی سنے۔انہوں نے ہسپتال کے عملے سے گفتگو کرتے ہوئے کہا کہ طب ایک مقدس پیشہ ہے اور دکھی انسانیت کی خدمت صدقہ جاریہ ہے۔