مظفرگڑھ ۔ (مظفر گڑھ ڈاٹ سٹی۔ 18 جنوری2019ء) چیف ایگزیکٹیو آفیسر محکمہ صحت مظفرگڑھ ڈاکٹر ضیاء الحسن نے کہا کہ انشاء اللہ سال 2019 پاکستان میں پولیو کے خاتمہ کا سال ہوگا ، جس کے لئے ہم نے انسدادپولیو مہم کو کامیاب بنانے کیلئے مؤثر حکمت عملی مرتب کی ہے ، جس میں پولیو جیسے موذی مرض کے خاتمے کیلئے عوام کی آگاہی کیلئے شہر کے پبلک مقامات پر بینر آویزاں کئے جائیں گے۔اس ضمن میں کسی قسم کی کوتاہی قابل برداشت نہیں ہوگییہ بات انہوں نے ڈی ایچ کیو ہسپتال میں ماہ جنوری کی انسداد پولیو مہم کی افتتاحی تقریب سے خطاب کرتے ہوئے کہی۔ قبل ازیں سی ای او ہیلتھ اور ڈاکٹر مہر اقبال ایم ایس ڈی ایچ کیو ہسپتال مظفرگڑھ نے بچوں کو پولیو سے بچاؤ کے قطرے پلاکر مہم کا باقاعدہ آغاز کیا اس موقع پر ڈاکٹر طارق محمود ڈی ایچ او نے بریفنگ دیتے ہوئے بتایا کہ انسداد پولیو مہم کیلئے تمام انتظامات مکمل کر لئے گئے ہیں ضلع بھر میں پانچ سال تک کی عمر کے 4لاکھ80ہزار591 بچوں کو گھر گھر جا کر پولیو سے بچاؤ کے قطرے پلائے جائیں گے اس مقصد کے حصول کے لیے محکمہ صحت کی جانب سے 1097 ٹیمیں تشکیل دے دی گئی ہیں۔