مظفرگڑھ (مظفرگڑھ ڈاٹ سٹی۔ 09 دسمبر2019ء) ڈسٹرکٹ بار ایسوسی ایشن مظفرگڑھ نے بار کے ممبر محمد ارشد ڈب ایڈووکیٹ کو قتل کے جھوٹے مقدمے میں ملوث کرنے پر پولیس کے خلاف پیر کوفل ڈے ہڑتال کی اور محمد ارشد ڈب ایڈووکیٹ کے ساتھ اظہار یکجہتی کیلئے عدالتوں کا بائیکاٹ کیا اور مقدمات کی پیروی نہیں کی جس کی وجہ سے دوردراز سے آنے والے سائلین کو پریشانی کا سامنا کرنا پڑا ۔
ارشد ڈب ایڈووکیٹ کے بھائی اللہ ڈتہ کو گزشتہ ماہ تھانہ خانگڑھ کے علاقے موضع بلیواہن میں اراضی کے تنازعہ پر قتل کر دیا گیا تھا اور ملزمان کے خلاف قتل کا مقدمہ درج ہو گیا تھا، ملزم فریق نے مقتول کے بھائی ارشد ڈب ایڈووکیٹ کو مبینہ طور پر پولیس کی ملی بھگت سے قتل کے ایک جھوٹے مقدمے میں ملوث کرکے اس کے خلاف قتل کا مقدمہ درج کرادیا ہے حالانکہ وقوعہ کے وقت ارشد ڈب ایڈووکیٹ جائے واردات پر موجود بھی نہیں تھا مخالف فریق نے ارشد ڈب پر مقتول کے سر پر رائفل کا بٹ مارنے کا الزام لگایا ہے جبکہ پوسٹمارٹم رپورٹ میں سر پر کسی چوٹ کا زکر تک نہ ہے وکلا نے ارشد ڈب ایڈووکیٹ کے خلاف جھوٹی ایف آئی آر درج کرنے پر پولیس کے خلاف احتجاج کیا عدالتوں کا بائیکاٹ کیا اور اظہار یکجہتی کیلئے ریلی نکالی احتجاج کرنے والے وکلا سے ایس پی انویسٹی گیشن سجاد گجر اور ڈی ایس پی سٹی عظمت خان گرمانی نے ملاقات کرکے مقدمے میں ملوث وکیل کے ساتھ انصاف کرنے اور اس کے خلاف مقدمہ خارج کرنے کی یقین دہانی کرائی جس پر وکلا نے احتجاج ختم کر دیا۔