مظفر گڑھ (مظفرگڑھ ڈاٹ سٹی۔ 14 اگست2022ء) صوبائی وزیر برائے ریونیو نوابزادہ منصور احمد خان نے کہا ہے کہ ہمیں یہ ملک پاکستان قائد محمد علی جناح کی قیادت میں ملا ہے اس کی ترقی، سلامتی اور خوشحالی کیلئے ہمیں قائد اعظم کے فرمودات پر ہی عمل کرنا ہو گا۔ ان خیالات کا اظہار انہوں نے ضلع کونسل کے جناح آڈیٹوریم میں پاکستان کی آزادی کی75ویں سالگرہ ڈائمنڈ جوبلی کی تقریب سے خطاب کرتے ہوئے کای ۔
اس موقع پر ڈپٹی کمشنر علی عنان قمر، ڈی پی او احمد نواز، اسسٹنٹ کمشنر جمیل حیدر شاہ، سی ای او تعلیم مسعود ندیم بھی موجود تھے۔ صوبائی وزیر نے کہا کہ قائد اعظم نے فرمایا تھا کہ اس ملک کا نظام اسلامی ہوگا، کشمیر ہماری شہ رگ ہے جس کا مطلب کشمیر کے بغیر پاکستان زندہ نہیں رہ سکتا، کیونکہ کشمیر کے بدولت ہمارے ملک میں ہریالی ہے، ہماری زراعت کا دارومدار کشمیر سے آنے والے پانی پر ہے، اسی پانی پر ڈیم ہیں جس سے ہمیں بجلی ملتی ہے، اس لئے مقبوضہ کشمیر کے آزادی ہمارے لئے ناگزیر ہے۔
تقریب میں سکولوں کے طلباء و طالبات نے ملی نغمے، قومی ترانے، تقاریر، ٹیبلواور میجک شوپیش کئے گئے جن کو حاضرین نے بڑا سراہا۔ تقریب کی نظامت کے فرائض افضل چوہان اور عبدالغفار نے سرانجام دئیے۔ قبل ازیں ڈپٹی کمشنر آفس میں پرچم کشائی کی تقریب کا انعقاد کیا گیا جس میں صوبائی وزیر ریونیو نوابزادہ منصور احمد خان، ڈپٹی کمشنر علی عنان قمر، ڈی پی او احمد نواز نے پرچم کشائی کی۔
پنجاب پولیس اور ریسکیو1122کے چاق و چوبند دستوں نے سلامی دی۔ تقریب کے اختتام پر مولانا عبدالمعبود آزاد نے ملک کی سلامتی، خوشحالی اور ترقی کیلئے دعا کرائی۔ صوبائی وزیر نوابزادہ منصور احمد، ڈپٹی کمشنر علی عنان قمرا ور ڈی پی او احمد نواز نے ضلع کونسل کے لان میں پودے لگائے اور عوام میں بھی پودے تقسیم کئے۔ تقریب میں ڈپٹی ڈائریکٹر سوشل ویلفیئر محمد اکرم تکلیر، ریسکیو 1122سے میاں حسین، اسامہ ذیشان، چیئر مین سول سوسائٹی ملک خیر محمد بدھ، پروفیسر افتخار ہاشمی، ام کلثوم سیال، ناظم بلوچ، انجمن تاجران سے سید امیر حسن، شیخ عامر سلیم، غلام علی بخاری سمیت اساتذہ، طلباء و طالبات اور شہریوں کی کثیر تعداد موجود تھے۔\378