مظفرگڑھ۔10 فروری(مظفر گڑھ ڈاٹ سٹی۔ 10 فروری2018ء) ملک سے پولیو جیسے موذی مرض کے مکمل خاتمے کیلئے ہم پر عزم ہیں اور انشاء اللہ جلد ہی پاکستان کو پولیو فری ملک بنا دیا جائے گا۔ان خیالات کا اظہار ڈپٹی کمشنر محمد سیف انو ر نے ضلعی ہیڈ کوارٹر ہسپتال مظفرگڑھ میں پولیو سے بچائو کی ماہانہ مہم کا افتتاح کرتے ہوئے کیا، انہوںنے کہا کہ محکمہ صحت کے افسران اور اہلکاروں کے ساتھ ساتھ ہر شہر ی کی ذمہ داری ہے کہ وہ اپنے 5سال تک کی عمر کے ہر بچے کو ہر بار پولیو سے بچائو کی ویکسین کے قطرے ضرور پلائیں اور دوسروں کو اس کی ترغیب دیں ، انہوں نے کہا کہ 100فی صد نتائج کے حصول کیلئے عوام میں بھی اس کا شعور اور آگاہی بیدار کی جائے ، اس موقع پر چیف ایگزیکٹو آفیسر صحت ڈاکٹر شاہد حسین مگسی نے بتایاکہ تین روزہ مہم کے دوران ضلع میں 5سال تک کی عمر کے 8لاکھ41ہزار83بچوں کو پولیو سے بچائو کی ویکسین کے قطرے پلائے جائیں گے، جس کیلئے محکمہ صحت اور تربیت یافتہ رضاکاروں پر مشتمل 1880 ٹیمیں بنائی گئی ہیں، جو دور دراز کے علاقوں میں گھر گھر جا کر بچوں کو قطرے پلائیں گی، اس کے علاوہ ڈسپنسری، بس و ویگن سٹینڈ، ریلوے اسٹیشن پر بھی ٹیمیں موجود ہوں گی۔