مظفرگڑھ (مظفرگڑھ ڈاٹ سٹی۔ 22 ستمبر2022ء) ڈپٹی کمشنر مظفرگڑھ علی عنان قمر کی ہدایت پر ضلعی انتظامیہ نے کارروائی کرتے ہوئے 600ایکڑ سرکاری اراضی واگزار کرالی ہے، قبضہ مافیا کے خلاف جاری کارروئی پر اسسٹنٹ کمشنر جمیل حیدر شاہ نے موضع رکھ خان پور میں 600ایکڑ پر بنایا گیا مچھلی فارم کی ارضی کو واگزار کرالیا ہے۔
اسسٹنٹ کمشنر کا کہنا تھا کہ ڈپٹی کمشنر کی ہدایت پر سرکاری زمین پر قابض مافیا کے خلاف گرینڈ آپریشن جاری رہے گا۔
دوسری جانب ڈپٹی کمشنر علی عنان قمر نے اس موقع پر بتایا کہ ضلعی انتظامیہ قبضہ مافیا کے خلاف جاری آپریشن میں اب تک 1000ایکڑ سے زائد سرکاری زمین واگزار کراچکی ہے۔انہوں نے کہا کہ ضلع کے تمام اسسٹنٹ کمشنران کو ہدایت کی گئی ہے کہ وہ سیاسی دباؤ کی پرواہ کئے بغیر غیر قانونی قبضہ کرنے والوں کے خلاف کارروائی جاری رکھیں۔