مظفرگڑھ (مظفرگڑھ ڈاٹ سٹی۔ 25 اکتوبر2022ء) کوٹ ادو میں دوران ڈکیتی تین افراد کے قتل کے واقعہ پر ایڈیشنل آئی جی ساوتھ پنجاب ڈاکٹر احسان صادق نے سخت نوٹس لیتے ہوئے دو ایس پیز کے تحت سپیشل ٹیمیں تشکیل دے دیں۔
انہوں نے ڈی پی او کوٹ ادو کو ڈاکوؤں کی فوری گرفتاری کا حکم دیا اور متاثرین کو یقین دلایا کہ واقعہ کے مجرمان کو جلدی گرفتار کر لیا جائے گا ،ایڈیشنل آئی جی نے حکم دیا کہ ڈیوٹی میں غفلت برتنے والے پولیس افسران کے خلاف سخت کارروائی کی جائے اور متاثرین کو انصاف کی فراہمی کے لیے تمام وسائل بروئے کار لائے جائیں۔
یاد رہے کہ گذشتہ شب کوٹ ادو میں تھانہ صدر کوٹ ادو سے ایک کلومیٹر کے فاصلے پر واپڈا کالونی کے قریب سبزی منڈی کے سامنے 3 مسلح ڈاکوؤں نے گن پوائنٹ پر ایک شہری سے موٹرسائیکل چھین کر فرار ہوتے ہوئے راستے میں آنے والے 3 کمسن لڑکوں 12 سالہ شعیب، 14 سالہ احسن اور 16 سالہ طیب کو فائرنگ کر کے قتل کر دیا تھا اور موقع سے فرار ہو گئے تھے۔