مظفرگڑھ۔ (مظفرگڑھ ڈاٹ سٹی ۔ 05 اگست2019ء) چیف منسٹر پنجاب شکایات سیل کی وائس چیئرمین مہناز سعید نے مقبوضہ کشمیر میں بھارتی بربریت کی بھرپور مذمت کرتے ہوئے کہا ہے کہ عالمی برادری اور انسانی حقوق کی تنظیمیں کشمیر میں ہونیوالے بھارتی ظلم وستم کا نوٹس لیں اوربھارت کو قتل عام سے روکیں۔
کشمیری قوم اپنی آزادی کی جنگ لڑ رہی ہے اور یہ ہر قوم کا بنیادی حق ہے کہ وہ آزادانہ زندگی بسر کرسکے۔
اقوام متحدہ کی قراردادوں کے مطابق حق خود ارادیت کشمیری قوم کا حق ہے، عالمی برادری کو چاہئیے کہ وہ بھارت کو اقوام متحدہ کی قراردادوں پر عملدرآمد کیلئے مجبور کرے۔انہوں نے کہا کہ کشمیری بھائیوں کے ساتھ ہمارا ایمان کا رشتہ ہے، اور یہ اٹوٹ رشتہ کبھی ختم نہیں ہوسکتا۔ جبکہ کشمیر پاکستان کی شہہ رگ ہے، جس پر کوئی سمجھوتہ نہیں ہوسکتا۔