اسلام آباد: واپڈا نے سینئر افسر اور کہنہ مشق کمیونیکیشن ایکسپرٹ جناب عابد رانا کو ڈائریکٹر جنرل پبلک ریلیشنز (ڈی جی پی آر) تعینات کر دیا ہے۔ یہ پہلا موقع ہے کہ واپڈا میں اس عہدے پر باقاعدہ ڈی جی پی آر کی تقرری عمل میں لائی گئی ہے، اور یہ اعزاز جنوبی پنجاب کے ضلع مظفرگڑھ سے تعلق رکھنے والے اس ہونہار افسر کے حصے میں آیا۔
عابد رانا نے ابتدائی تعلیم گورنمنٹ ہائی اسکول مظفرگڑھ سے حاصل کی، بعد ازاں گورنمنٹ کالج مظفرگڑھ سے گریجویشن اور پنجاب یونیورسٹی لاہور سے ایم اے ماس کمیونیکیشن کی ڈگری حاصل کی۔ طالبعلمی کے زمانے سے ہی وہ ہم نصابی سرگرمیوں اور سکاؤٹنگ سے وابستہ رہے اور اسی میدان میں صدارتی ایوارڈ بھی حاصل کیا۔
انہوں نے 1999 میں محکمہ اطلاعات پنجاب میں بطور انفارمیشن آفیسر اپنے پیشہ ورانہ سفر کا آغاز کیا۔ 2003 میں وہ واپڈا سے منسلک ہوئے اور گزشتہ دو دہائیوں کے دوران ادارے کے امیج بلڈنگ، میڈیا ریلیشنز اور کمیونیکیشن اسٹریٹیجی کے اہم محاذوں پر مثالی کردار ادا کیا۔ ان کی متوازن حکمتِ عملی، قائدانہ صلاحیتوں اور تخلیقی وژن نے ادارے میں کئی کامیاب مہمات کو جنم دیا۔
واپڈا میں ڈی جی پی آر جیسے اہم عہدے پر ان کی تعیناتی نہ صرف ادارے کے میڈیا سیل کو مزید فعال بنائے گی بلکہ پبلک انگیجمنٹ کے معیار میں بھی بہتری متوقع ہے۔ یہ تقرری مظفرگڑھ جیسے پسماندہ ضلع کے لیے بھی باعثِ افتخار ہے جہاں سے تعلق رکھنے والے ایک افسر نے قومی سطح پر اپنی صلاحیتوں کا لوہا منوایا ہے۔