News

25 شعبان سے بی آئی ایس پی کے تحت مستحق لوگوں کو مفت آٹا دیا جائے گا،وفاقی وزیر مملکت نوابزادہ افتخاراحمد

مظفرگڑھ (مظفرگڑھ ڈاٹ سٹی۔ 14 مارچ2023ء) وفاقی وزیر مملکت، پاکستان پیپلز پارٹی جنوبی پنجاب کے سیکرٹری اطلاعات اور رکن قومی اسمبلی نوابزادہ افتخار احمد خان نے بے نظیر انکم سپورٹ پروگرام رجسٹریشن آفس خان گڑھ کا دورہ کیا۔وفاقی وزیر مملکت نوبزادہ افتخار احمد خان نے بی آئی ایس پی رجسٹریشن آفس خانگڑھ کا تفصیلی وزٹ کیا۔

انہوں نے اسسٹنٹ ڈائریکٹر بی آئی ایس پی سہیل عارف کو ہدایت کی کہ رجسٹریشن کے عمل کو زیادہ سے زیادہ شفاف بنایا جائے، یونین کونسل کے نام کا پینا فلیکس خانگڑھ آفس میں لگایا جائے اور رش کو کم کرنے کےلئے ٹوکن سسٹم پر احسن طریقہ سے بلا تفریق کام کیا جائے ۔اس موقع پر نوابزادہ افتخار احمد خان کا کہنا تھا کہ غربت کے خاتمے کے لئے بے نظیر انکم سپورٹ پروگرام کے ذریعے پہلےسے اہل بینیفیشری ماہ رمضان المبارک میں مفت آٹا حاصل کر سکیں گے۔

مفت آٹا 25 شعبان سے شروع ہو گا۔ 10 کلو کے تین تھیلے فی گھرانے کو دئیے جائیں گے ،بے نظیر انکم سپورٹ پروگرام کا ماہ رمضان المبارک کے لیے انقلابی پروگرام جاری کیا گیا ہےجس سے مستحق گھرانے مفید ہو سکیں گے۔اس موقع پراسسٹنٹ ڈائریکٹر بینظیر انکم سپورٹ پروگرام سہیل عارف، پاکستان پیپلز پارٹی کے رہنما ملک عبدالرزاق جھانب ،ملک خورشیدنور،انجینئر ملک وسیم رزاق جھانب ضلعی سیکرٹری اطلاعات پاکستان پیپلز پارٹی مظفرگڑھ اور مقامی صحافی بھی موجود تھے۔

نواب افتخار احمد خان نے صحافیوں سے گفتگو کرتے ہوئے کہا کہ مسائل کی نشاندہی میڈیا کا فرض ہےوہ تنقید برائے اصلاح پر یقین رکھتے ہیں۔انہوں نے مزید کہا کہ اخبارات کے پڑھنے سے سیاسی لوگوں کی راہنمائی ہوتی ہے، صحافی حضرات کھل کر اور بے لاگ تبصرہ کیا کریں۔