کاشتکار آئندہ سال گندم کی کاشت کیلئے کنگی کی بیماری کے خلاف قوت مدافعت رکھنے والی اقسام کا بیج خود تیار کریں، محکمہ زراعت

مظفرگڑھ(مظفر گڑھ ڈاٹ سٹی۔16 مارچ۔2016ء) کاشتکار آئندہ سال گندم کی کاشت کیلئے کنگی کی بیماری کے خلاف قوت مدافعت رکھنے والی اقسام کا بیج خود تیار کریں۔ گلیکسی- 2013،فیصل آباد2008-اورپنجاب 2011- کنگی کی بیماری کے خلاف قوت مدافعت اور بھرپور پیداوار دینے والی اقسام ہیں۔ ان خیالات کا اظہار مہرعابد حسین ڈسٹرکٹ آفیسر زراعت (توسیع) مظفرگڑھ نے کھڑکن اڈا، چوک سرور شہید، تحصیل کوٹ ادو ضلع مظفر گڑھ میں مہر اصغر سیال کے ڈیرے پر منعقدہ فارمر ڈے کے موقع پر کاشتکاروں اور میڈیا کے نمائندوں سے گفتگو کرتے ہوئے کیا۔انہوں نے کہاکہ محکمہ زراعت حکومت پنجاب کا کنگی کیخلاف قوت مدافعت رکھنے والی اقسام کے بیج کی فراہمی سے اس بیماری سے نمٹنے اور گندم کی پیداوار میں اضافہ کیلئے خاص پیش رفت ثابت ہو گی۔انہوں نے کہا کہ موسمیاتی تبدیلی کی وجہ سے جنوبی پنجاب کے اضلاع میں فروری- مارچ میں زیادہ بارشوں اور کم درجہ حرارت کی وجہ سے موسم پچھلے چند سالوں سے کنگی کی بیماری کیلئے سازگار رہا ہے۔جسکی وجہ سے گندم کی پیداوار میں کمی اور غذائی تحفظ کو یقینی بنانے کیلئے مشکلات درپیش ہیں۔مہر عابدحسین نے کہا کہ گندم کی قسم گلیکسی 2013 آبپاش علاقوں کیلئے زیادہ موزوں ہے۔ جوکنگی کے خلاف قوت مدافعت ،ناموافق حالات کو برداشت کرنے کی بہترین صلاحیت رکھتی ہے۔مہر عابد حسین نے کہا کہ کاشتکار ان اقسام کا بیج محکمہ زراعت کی سفارشات کے مطابق خود تیا ر کریں تاکہ گندم کی پیداوار میں اضافے اور کنگی کی بیماری کی وجہ سے پیداوار میں کمی کے ممکنہ خطرے سے نمٹا جا سکے۔ ۔