چیئرمین بلدیہ خان گڑھ کیخلاف تحریک عدم اعتماد کامیاب

مظفر گڑھ۔25 اگست(مظفر گڑھ ڈاٹ سٹی۔ 25 اگست2018ء) چیئرمین بلدیہ خان گڑھ کے خلاف تحریک عدم اعتماد 13 وو ٹوں سے کامیاب ہو گئی اور چیئرمین شیخ لیاقت علی فارغ ہو گئے،تفصیل کے مطابق میونسپل کمیٹی خان گڑھ کے چیئرمین شیخ حاجی لیاقت علی کے خلاف ہفتہ کے روز عدم اعتماد کی تحریک پر جناح ہال میں خصوصی اجلاس منعقد ہوا.جس میں ڈپٹی ڈائریکٹر لوکل گورنمنٹ مظفرگڑھ ملک محمد امین نے شرکت کی اور اجلاس کی کارروائی مکمل کی، بلدیہ کے 15 میں سے 13 کونسلرز نے تحریک کے حق میں ووٹ دیا جبکہ چیئرمین لیاقت علی اور ان کے ایک ساتھی کونسلر ارشد نائیک اجلاس میں نہیں آئے، چیئرمین نے عدم اعتماد کے طلب کردہ اجلاس سے کچھ دیر قبل اپنا استعفی بلدیہ کوبجھوایا لیکن اسے ڈی ڈی اولوکل گورنمنٹ نے تسلیم کرنے سے انکار کر دیا اور کہا کہ قانون کے مطابق اب یہ وصول نہیں ہو سکتا. اس کا وقت گزر چکا ہے، اجلاس کے بعد انہوں نے تحریک عدم اعتماد کے کامیاب ہونے اور چیئرمین لیاقت علی کی سبکدوشی کا باضابطہ اعلان کیا، سردار آباد ڈوگر گروپ اور پی ٹی آئی گروپ کے کونسلرز نے عدم اعتماد کی کامیابی پر جشن منایا اور مٹھائی تقسیم کی۔