پیاز توڑنے کی سزا،مظفر گڑھ کی تحصیل جتوئی میں زمیندار نے 6سالہ بچی پر کتا چھوڑ دیا ،کتے کے کاٹے سے بچی شدید زخمی ہوگئی ، نشتر ہسپتال منتقل

مظفر گڑھ(مظفر گڑھ ڈاٹ سٹی۔17جون۔ 2013ء) ضلع مظفر گڑھ کی تحصیل جتوئی میں زمیندار نے کھیت سے پیاز توڑنے پر 6سالہ بچی پر کتا چھوڑ دیا۔کتے کے کاٹے سے بچی شدید زخمی ہوگئی۔ نشتر ہسپتال کے برن سینٹر میں داخل ۔ ضلع مظفر گڑھ کی تحصیل جتوئی کے نواحی علاقے لنڈی پتافی میں مبینہ طور پر کھیت میں داخل ہوکر پیاز توڑنے پر 6سالہ بچی زبیدہ پر کتا چھوڑ دیا۔کتے کے کاٹنے سے لڑکی کا ناک بری طرح متاثر ہوگیا۔لڑکی کے والد طالب کے مطابق ان کے دیگر چار بچے اور 6 سالہ زبیدہ مقامی زمیندار جاوید کے کھیت میں گئے جس پر زمیندار نے ان پر کتا چھوڑ دیا۔ دیگر بچے موقع سے بھاگ گئے جبکہ چھے سالہ زبیدہ کو کتے نے کاٹ کر بری طرح زخمی کردیا اور اس کا ناک چبا لیا۔ تھانہ میر ہزار خان نے مقامی زمیندار کے خلاف مقدمہ درج کرلیا ہے ۔ بچی نشتر ہسپتال کے برن یونٹ میں داخل ہے۔لڑکی کے والد کے مطابق واقعہ پندرہ روز قبل پیش آیا اور مقامی زمیندار سے ان کا رشتے پر پرانا تنازعہ چلا آرہا ہے۔ میڈیا پر خبر نشر ہونے کے بعد وزیراعلی پنجاب نے واقعہ کانوٹس لیتے ہوئے پولیس حکام کو ذمہ داروں کے خلاف سخت کاروائی کا حکم دیا ہے۔