وزیر صحت کا گورنمنٹ رجب طیب اردوان ہسپتال مظفرگڑھ کے توسیعی منصوبے کا دورہ

مظفرگڑھ۔24جنوری(مظفر گڑھ ڈاٹ سٹی۔ 24 جنوری2018ء)صوبائی وزیر برائے صحت خواجہ سلمان رفیق نے گورنمنٹ رجب طیب اردوان ہسپتال مظفرگڑھ کے توسیعی منصوبے کا اچانک دورہ کیا ، اس موقع پر سیکرٹری صحت علی جان خان اور محکمہ صحت کے ضلعی افسران بھی ان کے ہمراہ تھے۔انہوں نے کہا کہ پنجاب حکومت جنوبی پنجاب کے لوگوں کو علاج معالجے کی بہترین اور معیاری سہولتوں کی فراہمی کیلئے گورنمنٹ رجب طیب اردوان ہسپتال میں 250 بستروں کا اضافہ کر رہی ہے۔انہوںنے کہا کہ تعمیراتی کاموں پر کام کی رفتار کو مزید تیز کیا جائے اور اس ہسپتال میں توسیع سے لوگوں کو بے پناہ سہولت ملے گی۔ انہوں نے کہا کہ گورنمنٹ رجب طیب اردوان ہسپتال جنوبی پنجاب کی عوام کو جدید سہولتیں فراہم کررہا ہے اور کسی ہسپتال کی نجکاری نہیں کی جارہی ۔اس ہسپتال میں ہر مریض کا مفت علاج ہوتا ہے۔انہوںنے کہاکہ میں نے آج ہسپتال کے توسیعی منصوبے کی زیر تعمیر عمارت کا جائزہ لیا ہے،انہوں نے کہا کہ ترک حکومت نے 60بستروں پر مشتمل رجب طیب اردوان ہسپتال بنایا۔پنجاب حکومت نے پہلے اس ہسپتال کو 120 بستروں تک بڑھایا اوراب پنجاب حکومت اس ہسپتال میں 250بستروں کا اضافہ کررہی ہے ، اس سال ہسپتال کا توسیعی منصوبہ چالوہوجائے گااورجنوبی پنجاب کے عوام کو طبی سہولتوں کی فراہمی شروع کر دے گااوراس ہسپتال میں علاقے کے عوام کو شاندار علاج معالجہ میسر آئے گا۔ملک کی 70سالہ تاریخ میں کونسا ایسا موقع آیا جب کسی نے جنوبی پنجاب میں اربو ں روپے کی لاگت سے ترقیاتی منصوبے شفافیت اوراعلی معیار کے بنائے ہوں۔