وزیراعلیٰ پنجاب کی ہدایت پر سیلاب متاثرین کے نقصانات کے ازالہ کے لئے ریلیف پیکج تیار کر لیا گیا ہے،صوبائی وزیر مال نواب زادہ منصور احمد خان

حکومت نے سیلاب متاثرہ علاقوں کیلئے آبیانہ اورمالیہ معاف کرنے اورسیلاب متاثرہ علاقوں میں ایمرجنسی کے نفاذ کااعلان بھی کیاہے۔

تمام سیلاب متاثرہ علاقوں کو آفت زدہ قرار دے دیاگیاہے۔ حکومت نے مالی امداد جلد از جلد سیلاب متاثرین تک پہنچانے کی ہدایت کی ہے۔ گھروں،فصلوں اورلائیوسٹاک کو پہنچنے والے نقصان کا پورا ازالہ کیا جائے گا۔انہوں نے مزید کہا کہ وزیر اعلیٰ پنجاب کی ہدایت پر سیلاب متاثرین کی جان و مال اور مال مویشیوں کے نقصانات کے ازالہ کے لئے ریلیف پیکج تیار کر لیا گیا ہے۔

وزیر اعلیٰ پنجاب چودھری پرویز الٰہی نے سیلاب متاثرین کی مدد کیلئے مالی امداد کے چیک پر نوابزادہ منصور علی خان کا شکریہ ادا کیا۔وزیراعلیٰ پرویز الہٰی نے سیلاب متاثرین کی مدد کے جذبے کو سراہا۔متاثرین سیلاب کی مدد کے لئے آگے آنا عبادت سے کم نہیں۔ انہوں نے کہا کہ پوری قوم کو فوری طور پر اپنے سیلاب متاثرہ بھائیوں کے لئے دل کھول کر مدد کرنا چاہیے۔

مصیبت میں گھرے بہن بھائیوں کی مدد قوم کی مشترکہ ذمہ داری ہے۔ قوم متاثرین کی بحالی اور آبادی کاری کے کار خیر میں بھرپور حصہ ڈالے گی۔ انہوں نے کہا کہ صاحب ثروت افراد کی دینی، قومی اور اخلاقی ذمہ داری ہے کہ وہ سیلاب زدگان کی مدد کو اولین ترجیح دیں۔حکومت پنجاب عوام کی مدد کے ساتھ سیلاب متاثرین کی مدد کے لئے تمام ممکنہ وسائل بروئے کار لارہی ہے۔

وزیر مال نے کہا کہ پنجاب حکومت کی سیاسی و انتظامی ٹیم ریسکیو اینڈ ریلیف آپریشن کی نگرانی کے لیے فیلڈ میں موجود ہے۔ انہوں نے کہا کہ جنوبی پنجاب میں غیر معمولی بارشوں و سیلاب سے ہر شخص کو پریشانی کا سامنا ہے۔ جن علاقوں میں سیلاب آیا ہے وہاں کی تباہ کاریوں کوبیان نہیں کیا جا سکتا۔ ہمیں تمام اختلافات پس پشت ڈال کار مصیبت زدہ بہن بھائیوں کی مدد کرنے کو اولیت دینا ہو گی۔