مظفر گڑھ میں وحشیانہ تشدد کر کے اپنے تین بچوں کو قتل کرنے والے شخص نے خود کو پولیس کے حوالے کر دیا، جاں بحق ہونے والے تین بچے سپردخاک

مظفر گڑھ (مظفرگڑھ ڈاٹ سٹی ۔ 7جولائی 2008ء) مظفر گڑھ میں سفاک باپ نے وحشیانہ تشدد کر کے اپنے تین بچوں کو قتل کر دیا اور خود کو پولیس کے حوالے کر دیا۔ تشدد کا شکار ہونے والے تین بچوں کی حالت تشویشناک بتائی جاتی ہے ۔ جاں بحق ہونے والے تین بچوں کو سپردخاک کردیا گیا ہے ۔

نمائندہ نجی ٹی وی کے مطابق بستی بڈانی کا رہائشی پینتیس سالہ مستری عبدالسلام کراچی میں کئی ماہ کی بے روزگاری کے بعد گھر واپس پہنچا اور اپنے چھ بچوں پر شدید تشدد کیا جس کے نتیجے میں ڈیڑھ سالہ خدیجہ، چار سالہ سمیعہ اور چھ سالہ ندیم موقع پر جاں بحق ہو گئے ، چار سالہ صفیہ ،آٹھ سالہ شکیلہ اوردس سالہ شبانہ کو تشویشناک حالت میں اسپتال منتقل کر دیا گیا ہے ۔

تھانہ خیر پور سادات میں گرفتاری دیتے ہوئے ملزم نے موٴقف اختیار کیا کہ وہ بچوں کو فاقوں سے مرتا نہیں دیکھ سکتا تھا۔ اس لیے ڈنڈوں سے تشدد کرکے انہیں ہلاک کر دیا۔ پولیس مزید تحقیقات کر رہی ہے ۔