مظفر گڑھ میں اس سال بھی پلاسٹک ٹنل، اوپن فیلڈ میں ٹماٹر کی فصل کے پیداواری مقابلے کا انعقاد ہوگا

مظفر گڑھ (مظفر گڑھ ڈاٹ سٹی۔16 جنوری۔2016ء) ضلع مظفر گڑھ میں گزشتہ سال کی طرح امسال بھی پلاسٹک ٹنل اور اوپن فیلڈ میں ٹماٹرکی فصل کے پیداواری مقابلے منعقد کیے جا رہے ہیں۔پوزیشن حاصل کرنے والے کاشتکاروں میں انعامات تقسیم کیے جائیں گے۔سبزی کے کاشتکارابھی سے بھرپور تیاری کر لیں۔پیداواری مقابلہ میں بڑھ چڑھ کر حصہ لیں۔پلاسٹک ٹنل میں کاشتہ ٹماٹر کی فصل کیلئے 2 ایکڑ اور اوپن فیلڈ میں کاشتہ ٹماٹر کی فصل کے 3 ایکڑ پیداواری مقابلے کیلئے پیش کرنے ہوں گے۔ان خیالات کا اظہارمہر عابد حسین ڈسٹرکٹ آفیسر زراعت (توسیع) مظفر گڑھ نے کاشتکاروں سے گفتگو کرتے ہوئے کیا۔انہو ں نے کہا کہ ٹماٹر کے پیداواری مقابلوں میں 12ایکڑ تک کے سبزی کے چھوٹے کاشتکار حصہ لینے کے اہل ہوں گے۔فصل کے معائنہ اوربرداشت کے بعد پیداوار کی بناء پرہر دو کیٹیگری میں پہلی، دوسری اور تیسری پوزیشن کا اعلان کیا جائے گا اور پوزیشن حاصل کرنے والے کاشتکاروں میں انعامات تقسیم کیے جائیں گے۔انہوں نے کہاکہ ضلع مظفر گڑھ میں سبزی کے کاشتکاروں کیلئے ٹماٹر ایک اہم فصل ہے۔کاشتکار پیداواری مقابلہ میں حصہ لے کر نہ صرف اپنی پیداوار میں اضافہ کریں بلکہ انعامات بھی حاصل کریں۔ انہوں نے کہا کہ محکمہ زراعت کے تحت ان مقابلہ جات کے انعقاد سے مسابقت کی فضا پیدا ہو گی۔ جس سے پیداوار میں مزید اضافہ ہو گا۔