مظفر گڑھ اور خیرپور میں ٹریفک حادثات ، 4مسافرجاں بحق، 80زخمی

مظفر گڑھ/خیرپور(مظفر گڑھ ڈاٹ سٹی۔ 26 جون۔2015ء )مظفر گڑھ اور خیرپور میں ٹریفک حادثات میں 4مسافرجاں بحق جبکہ 80زخمی ہوگئے ،زخمیوں کو قریبی ہسپتالوں میں منتقل کردیا گیا جن میں سے کئی کی حالت تشویشناک ہے اور ہلاکتوں میں اضافہ کا خدشہ ہے ۔جمعہ کو پولیس کے مطابق مظفر گڑھ کی تحصیل علی پور میں حمزے والی میں مسافر بس اور ٹرک میں تصادم ہو گیا جس کے نتیجے میں 4 افراد جاں بحق اور 45 زخمی ہو گئے۔امدادی ٹیموں کے اہلکاروں نے معمولی زخمیوں کو قریبی ہسپتالوں میں منتقل کیا جب کہ شدید نوعیت کے زخمیوں کو نشترہسپتال منتقل کیا جہاں ڈاکٹرز کے مطابق متعدد افراد کی حالت تشویشناک ہونے کے باعث ہلاکتوں میں اضافے کا خدشہ ہے۔پولیس حکام کا کہنا ہے کہ بس کراچی سے پشاور جارہی تھی اور حادثہ تیز رفتاری کے باعث پیش آیا اور واقعہ کا مقدمہ درج کر کے تحقیقات کا آغاز کردیا گیا ۔دوسری جانب خیرپور میں قومی شاہراہ پر موٹرسائیکل سواروں کو بچاتے ہوئے مسافر کوچ الٹ گئی جس کے نتیجے میں بچوں اور خواتین سمیت پینتیس افراد زخمی ہو گئے، زخمیوں کو سول اسپتال منتقل کر دیا گیا۔مسافروں سے بھری کوچ شاہ حسین بائی پاس کے قریب پہنچی تو موٹرسائیکل سوار دو افراد کو بچاتے ہوئے ڈرائیور کے کنٹرول سے بے قابو ہو کر الٹ گئی۔ کوچ میں ساٹھ سے زائد افراد سوار تھے۔زخمیوں کو سول اسپتال خیرپور اور قریبی اسپتالوں میں منتقل کر دیا گیا۔موقع پر موجود افراد نے زخمی مسافروں کو کوچ سے باہر نکالا، زخمیوں میں خواتین اور بچے بھی شامل ہیں جن کا تعلق پنجاب کے مختلف علاقوں سے بتایا جاتا ہے۔حادثے کے باعث سول اسپتال خیرپور اور قریبی اسپتالوں میں ایمرجنسی نافذ کر دی گئی۔