مظفر گڑھ ،احساس کفالت سینٹر پر خاتون کے ساتھ مبینہ فراڈ،بائیو میٹرک تصدیق کرکے مکمل رقم ادا کرنے سے انکار کردیاگیا

مظفر گڑھ/اسلام آباد (مظفر گڑھ ڈاٹ سٹی۔ 13 اپریل2020ء) مظفرگڑھ میں احساس کفالت سینٹر پر خاتون کے ساتھ مبینہ فراڈ کا واقعہ پیش آیا جہاں انتظامیہ نے ان کی بائیو میٹرک تصدیق کرکے مکمل رقم ادا کرنے سے انکار کردیا۔ نجی ٹی وی نے اپنی رپورٹ میں بتایا کہ ضلع مظفر گڑھ کے تھانہ قریشی میں درج ایف آئی آر کے مطابق ذکیہ مائی کو سلمان اشرف نامی شخص نے میڈیا کا نمائندہ اور احساس پروگرام کا ممبر خود کو ظاہر کرتے ہوئے گورنمنٹ بوائز ہائی اسکول بصیرہ میں احساس پروگرام کے دوران تقسیم رقم سے پیسے نکلوا کردینے کا وعدہ کیا تھا۔ایف آئی آر میں انہوں نے بتایا کہ ذکیہ مائی نے اپنا شناختی کارڈ اس شخص کو دیا اور اس کے پاس کے پاس موجود تھمب امپریشن مشین پر انگوٹھا لگا کر تصدیق بھی کرائی تھی۔انہوںنے کہاکہ متاثرہ خاتون کے مطابق بائیو میٹرک تصدیق کرکے کہا گیا کہ 2 روز بعد پیسے لے جانا تاہم بعد ازاں معلوم ہوا کہ ان کے 12 ہزار روپے نکلوالیے گئے ہیں۔انہوں نے بتایا کہ گھروں میں کام کرکے گزارہ کرتی ہوں، میرے پیسے دلوائے جائیں۔ضلعی انتظامیہ کے مطابق خواتین سے کٹوتیوں اور فراڈ کے حوالے سے شکایات موصول ہورہی ہیں اور ان کے خلاف قانونی کاروائی کی جا رہی ہیں۔دوسری جانب وزیر اعظم کی معاون خصوصی برائے سماجی تحفظ ڈاکٹر ثانیہ نشتر نے بھی سماجی رابطے کی ویب سائٹ پر پیغام جاری کرتے ہوئے کہا کہ احساس ایمرجنسی کیش کی ترسیل میں بدعنوانی کے خاتمے کے لیئے تمام متعلقہ ریاستی ادارے احساس کے شانہ بشانہ کھڑے ہیں۔انہوںنے کہاکہ احساس ایمرجنسی کیش کی ترسیل میں ملوث بدعنوان عناصر کے خلاف درج کی گئی ایف آئی آروں پرہماری نظر ہے، ’میں اپنی آخری سانس تک کرپشن اور بد عنوانی کیخلاف لڑتی رہوں گی۔انہوں نے کہا کہ ہم تمام سیکیورٹی اداروں کے مشکور ہیں جو احساس ایمرجنسی کیش میں کرپشن کے خلاف جہاد میں ہمارے ساتھ بھرپور تعاون کر رہے ہیں۔