مظفر گڑھ،حساس ادارے کا ریٹائرڈ ملازم اغوا،20 لاکھ تاوان کا مطالبہ،مغوی پر تشدد کی وڈیو اہل خانہ کو موصول

مغوی محمد رفیع ولد الیاس مسیح کی ہمشیرہ ارشاد بی بی دختر الیاس مسیح کے پولیس تھانہ رنگپور کو دیئے گئے بیان کے مطابق اس کا بھائی محمد رفیع ولد الیاس مسیح جو کہ ریٹائرڈ آرمی ملازم ہے 2 جولائی کو خانیوال اپنے ایک عزیز بابا رشید کے پوتے کی شادی میں شرکت کیلئے خانیوال گیا جہاں سے 3 جولائی کو واپسی پر اس نے کسی نامعلوم نمبر سے فون کر کے بتایا کہ اسے کچھ آدمیوں نے اغوا کر لیا ہے اور اس نمبر پر 1000 روپے کا لوڈ بھی بھیجنے کا کہا اس کے بعد سے اس سے رابطہ نہیں ہو سکا۔

ارشاد بی بی کے بیان پر پولیس تھانہ رنگپور نے اس کے مغوی بھائی کے اغوا ءکی رپوٹ درج کر لی ہے۔ارشاد بی بی کے مطابق اب اسے اس کے مغوی بھائی پر تشدد کی وڈیو بھیج کر اغوا ءکاروں نے 20 لاکھ روپے تاوان کا مطالبہ بھی کیا ہے۔ارشاد بی بی نے رنگپور پولیس پر معاملے میں دلچسپی نہ لینے کا الزام لگاتے ہوئے ڈی پی او مظفرگڑھ اور پولیس کے اعلیٰ حکام سے بھائی کی جلد بازیابی کا مطالبہ کیا ہے۔