مظفرگڑھ ۔نامعلوم افراد نے معمر عورت اور لڑکی کو دریا میں دھکا دے دیا،معمر عورت کو زندہ نکال لیا گیا،لڑکی کی تلاش جاری

مظفرگڑھ (مظفرگڑھ ڈاٹ سٹی۔ 27 فروری2023ء) مظفرگڑھ کے مضافات میں نامعلوم افراد نے معمر خاتون اور ایک لڑکی کو پل چناب سے دریا میں دھکا دے دیا،عورت کو زندہ نکال لیا گیا جبکہ،لڑکی کی تلاش جاری ہے ۔اطلاع ملنے پر ریسکیو 1122 کنٹرول روم نے فوراً قریبی پوائنٹ سے ایک ایمبولینس اور سنٹرل اسٹیشن مظفرگڑھ سے ریسکیو وہیکل روانہ کی۔

ریسکیو سٹاف نے موقع پر پہنچ کر بتایا کہ موقع پر موجود لوگوں نے اپنی مدد آپ کے تحت رجانا چک نمبر 285 ٹوبہ ٹیک سنگھ کی رہائشی 65 سالہ فرزانہ بی بی زوجہ سرور کو زندہ باہر نکال لیا تھا۔

موقع پر موجود کچھ لوگوں نے بتایا معمر عورت کے ساتھ ایک اور لڑکی کو بھی نامعلوم افراد نے دریا میں پھینکا تھا، جبکہ کچھ لوگوں کا کہنا تھا کہ صرف ایک معمر عورت کو ہی دریا میں دھکا دیا گیا تھا اور لڑکی کو نامعلوم کار سوار واپس ساتھ لے گئے تھے، پولیس تھانہ صدر نے معمر عورت کو تحویل میں لے کر تفتیش شروع کر دی اور سی سی ٹی وی کیمرہ کی ریکارڈنگ بھی کنٹرول روم میں دیکھی، سب انسپکٹر تھانہ صدر اشفاق نے ریسکیو کو کال کر کے کہا کہ ان کی تفتیش کے مطابق معمر عورت کے ساتھ ایک لڑکی کو بھی دریا میں دھکا دیا گیا تھا جو دریا میں ڈوب گئی ہے،ریسکیو 1122 نے پولیس کی درخواست پر لڑکی کی تلاش کےلئے دوبارہ سرچ آپریشن شروع کر دیا ہے۔