مظفرگڑھ سپر لیگ کا میلہ ڈولفنز نے لوٹ لیا، فائنل میں ڈولفنز نے ایگلز کو شکست دے کر جیت اپنے نام کر لی

مظفرگڑھ۔(مظفرگڑھ ڈاٹ سٹی ۔ 11 مارچ2022ء) مظفرگڑھ سپر لیگ کا میلہ ڈولفنز نے لوٹ لیا، فائنل میں ڈولفنز نے ایگلز کو شکست دے کر جیت اپنے نام کر لی۔ڈپٹی کمشنر مظفرگڑھ سید موسیٰ رضا اور سابق چیئرمین میونسپل کارپوریشن اکرم خان چانڈیہ اختتامی تقریب کے مہمان خصوصی تھے۔تقریب میں کرکٹ کے شائقین نے بھاری تعداد میں شرکت کی۔ڈپٹی کمشنر سید موسی ٰرضا نے تقریب سے خطاب کرتے ہوئے کھیلوں کی اہمیت پر روشنی ڈالی اور کہاکہ جہاں کھیل کے میدان آباد ہوتے ہیں وہاں کے ہسپتال اور جیلیں ویران ہوتی ہیں۔

انہوں نے کہا کہ مظفرگڑھ میں بہت ٹیلنٹ ہے جسے سامنے لانے کےلئے ایسے ایونٹس کرانا بہت ضروری ہے۔انہوں نے مظفرگڑھ میں سپر لیگ جیسا خوبصورت ایونٹ کرانے پر لیگ کے ڈائریکٹر اجمل چانڈیہ اور ان کی ٹیم کو مبارکباد دی۔ڈائریکٹر مظفرگڑھ سپر لیگ اجمل چانڈیہ نے اپنے خطاب میں بتایا کہ سپر لیگ میں پورے جنوبی پنجاب سے ٹیموں نے شرکت کی ہے۔ انہوں نے جنوبی پنجاب کے ٹیلنٹ کو سامنے لانے کےلیے حکومت اور ضلعی انتظامیہ سے کھیلوں کی سرپرستی کرنے اور کھلاڑیوں کو سہولیات فراہم کرنے کا مطالبہ کیا۔تقریب کے اختتام پر مہمان خصوصی نے جیتنے والی ٹیموں اور بہتر کھیل پیش کرنے والے کھلاڑیوں میں انعامات تقسیم کئے۔