News

مظفرگڑھ ،ورکشاپوں،ہوٹلوں اور کھیتوں میں کام کرنے والے مزدور بچوں کو مفت تعلیم دینے کے پروگرام کا آغاز

مظفرگڑھ(مظفرگڑھ ڈاٹ سٹی۔ 20 فروری2023ء) ہوٹلوں ، دکانوں، کھیتوں اور ورکشاپوں میں کام کرنےوالے بچوں کو مفت تعلیم کی فراہمی ،صبح نوسکول میں داخلے اور رجسٹریشن کےلئے ہیلپ لائن نمبر 1234متعارف کرائی گئی تھی ،جس کے تحت ہوٹلوں ، دکانوں ،کھیتوں اور ورکشاپوں میں کام کرنےوالے بچوں کو سکولوں میں داخل کیا جائے گا، سی ای او ایجوکیشن مظفرگڑھ کے مطابق ایڈیشنل سیکرٹری سکول ایجوکیشن جنوبی پنجاب سروش فاطمہ نے بتایا ہے کہ محکمہ سکول ایجوکیشن جنوبی پنجاب تعلیم کے بنیادی اور لازمی حق تک عوام کی آسان رسائی کے مشن پر کاربند ہے ۔

انہوں نے کہا کہ کئی مزدور بچے پڑھ لکھ کر زندگی میں آگے جانا چاہیے ہیں ،دوسرے بچوں کی طرح سکول جانا ان کا بھی ایک خواب ہوتا ہے لیکن بعض مجبوریوں کے سبب وہ ایسا کرنے سے قاصر نظر آتے ہیں،وہ ہیلپ لائن 1234 پر رابطہ کریں اور نام، ولدیت، فون نمبراور پتہ وغیرہ کی تفصیلات فراہم کریں۔

محکمہ سکول ایجوکیشن جنوبی پنجاب کا متعلقہ عملہ خود اس تک اور اس کے گھر والوں تک پہنچے گااور انہیں خوش اسلوبی سے قائل کرکے بچے کو گھر کے قریبی سکول میں داخلہ دلوائے گا۔

انہوں نے کہا کہ جن بچوں کی کچھ تعلیم ضائع ہو چکی ہے،جلد سیکھنے کے پروگرام کے تحت ان کے کھوئے ہوئے سالوں کا ازالہ مہینوں میں کیا جائے گا۔انہوں نے کہا ہے کہ شہری کسی بھی جگہ پر کسی ایسے مزدور بچے کو دیکھیں جو پڑھ لکھ کر زندگی میں کچھ بننا چاہتا ہو تو ہیلپ لائن 1234 پر اس کی رجسٹریشن کرائیں ۔