مظفرگڑھ۔ڈپٹی کمشنر مظفرگڑھ کی جانب سے جشن بہاراں کے لئے کمیٹی تشکیل دے دی گئی

مظفرگڑھ۔ (مظفرگڑھ ڈاٹ سٹی۔ 14 جنوری2020ء) ڈپٹی کمشنر مظفرگڑھ انجنئیر امجد شعیب ترین نے جشن بہاراں کے لئے کمیٹی تشکیل دے دی۔ تقریب مظفرگڑھ شہر کے وسط میں واقع اکلوتے پارک فیاض پارک میں منعقد کی جائے گی۔ تفصیل کے مطابق ڈپٹی کمشنر نے فیاض پارک میں جشن بہاراں فیسٹیول منانے کیلئے 6 افراد پر مشتمل کمیٹی تشکیل دے دی ہے۔کمیٹی جشن بہاراں منانے کیلئے مناسب تاریخ کا تعین کرے گی اور فیاض پارک کی دیواروں پر پینٹنگز بنانے کیلئے طالبعلموں اور سماجی کارکنوں میں پینٹنگ کمپیٹیشن کرائے گی۔

فیاض پارک کی تزئین نو کا نامکمل کام جلد مکمل کرانا بھی کمیٹی کے فرائض میں شامل ھو گا جشن بہاراں کو خوب تر بنانے کیلئے کمیٹی تمام ضروری اقدامات کرے گی۔ کمیٹی کا کنوینر ایڈیشنل ڈپٹی کمشنر ریوینیو مظفرگڑھ کو مقرر کیا گیا ھے جبکہ ممبران میں سی ای او محکمہ تعلیم،ڈپٹی ڈائریکٹر کالجز،ایکس ای این ھائی ویز،چیف آفیسر میونسپل کارپوریشن اور ایک مقامی این جی او سائیکوپ کی چیئرپرسن ام کلثوم سیال شامل ہیں۔