مظفرگڑھ۔چوک سرور شہید کو جلد ہی تحصیل کا درجہ دے دیا جائے گا،ڈاکٹر میاں شبیر علی قریشی

مظفرگڑھ۔ (مظفر گڑھ ڈاٹ سٹی۔ 07 فروری2020ء) وفاقی وزیر مملکت برائے ہاؤسنگ اینڈ ورکس ڈاکٹر میاں شبیر علی قریشی نے کہا ہے کہ چوک سرور شہید کو جلد ہی تحصیل کا درجہ دے دیا جائے گا اور کوٹ ادو تحصیل میں یونیورسٹی قائم کی جائے گی۔انہوں نے ان خیالات کا اظہار نیشنل پریس کلب چوک سرور شہید کے نو منتخب عہدیداران کی رسم حلف برداری کی تقریب سے خطاب کرتے ہوئے کیا۔انہوں نے کہا کہ چوک سرور شہید کو تحصیل کا درجہ دینے کے معاملہ پر انہوں نے وزیر اعظم عمران خان اور وزیر اعلیٰ پنجاب سردار عثمان بزدار سے بات کی ہے اور انہوں نے چوک سرور شہید کو جلد تحصیل کا درجہ دینے کا یقین دلایا ہے۔انہوں نے کہا کہ کوٹ ادو تحصیل کی آبادی 14 لاکھ افراد پر مشتمل ہے جبکہ ضلع مظفرگڑھ کی آبادی 42 لاکھ ہے اور اتنی بڑی آبادی کے ضلع میں کسی یونیورسٹی کا کیمپس تک موجود نہیں ہے تحریک انصاف کی حکومت جلد ہی یہاں یونیورسٹی کا قیام عمل میں لائے گی۔انہوں نے کہا کہ ملک میں حالیہ مہنگائی سابق دور حکومت کی غلطیوں کی وجہ سے ہے مشکل وقت گزر چکا ہے اور جلد ہی مہنگائی پر کنٹرول کر لیا جائے گا۔ نوجوانوں کیلئے نوکریوں اور روزگار کے مواقع پیدا کئے جائیں گے۔ انھوں نے کہا کہ چوک سرور شہید کے جن علاقوں میں گیس نہیں ھے وھاں جلد ھی گیس فراھم کردی جائے گی اور چوک سرور شہید کی تمام گلیاں پختہ اور سیوریج کے مسائل حل کر دئیے جائیں گے ۔