مظفرگڑھ، معصوم بچے کو خونخوار کتوں کے نوچنے کے واقعہ کا ڈراپ سین

مظفرگڑھ (مظفرگڑھ ڈاٹ سٹی۔ 30 اکتوبر2019ء) معصوم بچے کو شکاری خونخوار کتوں کے نوچنے کے واقعہ کا ڈراپ سین ہوگیا۔ چار روز قبل تھانہ خان گڑھ کے علاقے رقبہ نور خان کے محنت کش محمد یار بلوچ کے سات سالہ معصوم بچے نجف عباس کو اسی علاقے کے زمیندار غلام قادر بلوچ، ملک حاجی مونڈا اور ریاض حسین کے پالتو شکاری وخونخوار کتوں نے کاٹ کر بری طرح نوچ ڈالا اوراسکی ٹانگوں کا گوشت نوچ کر کھا گئے تھے، پولیس نے تینوں ملزمان کیخلاف مقدمہ درج کرکے ایک ملزم غلام قادر بلوچ کو گرفتار کرلیا، تاہم معاملہ میڈیا کے زریعے ہائی لائیٹ ہونے پر ایس ایچ اوتھانہ خان گڑھ سلیم خان جتوئی نے مقدمہ میں اقدام قتل کی دفعہ بھی ایزاد کرا دی تھی تاہم اس معاملے کا ڈراپ سین ہوگیا ہے اور بتایا جاتا ہے کہ متاثرہ والد نے ملزم پارٹی سے مبینہ طور پر بھاری رقم لیکر ان سے راضی نامہ کرلیا اور مجسٹریٹ کو بیان ریکارڈ کرادیا جس پر گرفتار زمیندار غلام قادر کو رہا کردیا گیا ہے۔