مظفرگڑھ، غیر حتمی انتخابی فہرستیں 208ڈسپلے سنٹرز پر آویزاں کردی گئی ہیں، ڈسٹرکٹ الیکشن کمشنر

مظفرگڑھ (مظفرگڑھ ڈاٹ سٹی۔ 08 جنوری2020ء) ڈسٹرکٹ الیکشن کمشنر مظفرگڑھ چوہدری محمد اکرم نے کہا ہے کہ غیر حتمی انتخابی فہرستیں ضلع بھر کے 208ڈسپلے سنٹرز پر آویزاں کردی گئی ہیں جو 24جنوری تک آویزاں رہیں گی، تمام سنٹر صبح 8بجے سے شام 4بجے تک کھلے رہیں گے، ہفتہ اور اتوار کو بھی یہ ڈسپلے سنٹر کھلے رہیں گے، جہاں عوام الناس اپنے ووٹ کے اندراج کا معائنہ کرسکتے ہیں، تمام ووٹر اپنا اور اپنے اہل خانہ کامستقل پتہ اور موجودہ پتہ کے مطابق ووٹ کی منتقلی یا درستگی کراسکتے ہیں۔انہوں نے کہا کہ تمام ووٹرز اپنے ووٹ کی تفصیلات اپنے موبائل سے اپنا شناختی کارڈ نمبر 8300پر بھیج کر بھی حاصل کرسکتے ہیں۔ انہوں نے کہا کہ ووٹ کا استعمال قومی فریضہ ہے لہٰذا اس کابروقت اندراج اور اس کی درستگی ہماری ذمہ داری ہے۔