مظفرگڑھ، سپر لیگ کا فائنل دارالارقم سکول ڈولفنز نے سنسنی خیز مقابلے کے بعد کاہلوں ڈیریز سٹالینز سے پانچ وکٹوں سے جیت لیا

مظفرگڑھ ۔ (مظفر گڑھ ڈاٹ سٹی۔ 15 جنوری2019ء) مظفرگڑھ سپر لیگ کا فائنل دارالارقم سکول ڈولفنز نے ایک دلچسپ اور سنسنی خیز مقابلے کے بعد کاہلوں ڈیریز سٹالینز سے 5وکٹوں سے جیت لیا۔ تقریب تقسیم انعامات سے خطاب کرتے ہوئے ڈپٹی کمشنر مظفرگڑھ ڈاکٹر احتشام انور نے کہا کہ صحت مند معاشروں کی تشکیل میں تعلیم کے ساتھ ساتھ کھیل بھی کلیدی کردار ادا کرتے ہیں، کھیلوں کے ذریعے نوجوان نسل کی جسمانی نشونماکے ساتھ ساتھ ان کی کردار سازی بھی کی جاتی ہے۔مظفرگڑھ سپر لیگ کاانعقاد مظفرگڑھ کیلئے بڑی اہمیت کا حامل ہے، جہاں کرکٹ کے شائقین کو ایک خوبصورت تفریح کا موقع ملا، وہاں ضلع کے کھلاڑیوں کی حوصلہ افزائی بھی ہوئی اور ان کی صلاحیتوں میں نکھار پیدا ہوا۔ ڈپٹی کمشنر نے امید ظاہر کی کہ آئندہ بھی کرکٹ کے ساتھ ساتھ دوسرے کھیلوں کے فروغ کیلئے ضلع میں عملی اقدامات کئے جائیں گے اور ضلع کی عوام کو اس طرح کے صحت مند تفریح کے مواقع میسر آئیں گے۔ اس موقع پر چیئر مین ضلع کونسل حافظ عمر خان گوپانگ نے اپنے خطاب میں کہا کہ مظفرگڑھ سپر لیگ ضلع کے لئے ایک اعزاز ہے۔